Air Greenland Tysklandimut timmisartuussilersoq
Tysklandimi angalatitsivik Hapag-Lloyd Cruises, juulip 15-iata septembarillu 13-iata akornanni Kangerlussuarmut utimullu timmisartuussinissamut attartortuuvoq. Nittartagaq check-in.dk taama allaaserisaqarpoq.
- Hapag Lloydip umiarsuarni takornariartaatini ilaasuuinik inuttaanillu Hamborgimit Kangerlussuarmut aasaru tallimariarluta timmisartuussissaagut. Siornatigut airberlin atortaraluarpaat, ukiormannali akitigut tunniussassatigullu unammillersinnaassuseqarsimavugut, Air Greenlandimi tuniniaanermi pisortaq Christian Kelsen check-in.dk-mut taama oqarpoq.
Tamanut tuniniaasoqassanngilaq
Pisortaq aamma ilisimatitsissutigaa attartuisoqarluni timmisartuussinissat pineqartut, Hapag Lloydilu avaqqullugu billetsinik tuniniaasoqassanngitsoq. Timmisartorsuarmi inissaqassappat, Hapag Lloyd Cruise nammineerluni billetsinik tuniniaassaaq.
Umiarsuarmi takornariartaammi MS Hanseaticimi ilaasut inuttallu nunatta Hamborgillu akornanni angallanneqassapput. Umiarsuaq 184-inik ilaasoqarsinnaavoq 125-nillu inuttaqarluni.
