Air Greenland: Tunumut timmisartuussisarnerit imaaliallaannaq allanngortinneqarsinnaanngillat
Tunumut timmisartuussinerit ulluni aalajangersimasuniinnaq pisarnerat imaalialaannaq allanngortinneqarsinnaanngilaq. Taama Air Greenland tunumiunut akissuteqarpoq.
Ippassaq oqaluttuaraarput, Tunumeersut Nuummit ingerlariaqqinneq ajulerlutik kingulliunneqartutut misigitinneqartuarnerminnik Air Greenlandimut naammagittaalliuutaat.
- Tunumit Kitaanut utimullu silaannakkut angallassineq akilersinnaanngereerpoq, Air Greenlandillu isertitassatigut annaasaqaatigisarpaa, taamaammat allanngortitsisinnaanngilagut Air Greenlandimi tuniniaanermut pisortaq Christian Keldsen oqarpoq.
- Angallassineq eqaatsoq ingerlatiinnassagutsigu amerlanerpaanik ilaasoqarnissaq anguniartariaqartarparput. Taamaammat assersuutigalugu Tunumut Kulusummut immikkut timmisartuussisoqarnissaanik aalajangiitinnata paasiniaqqaartarparput qassit ilaasussaanersut. Aamma misissortarparput, kitaani ilaasussat qassiunersut. Christian Keldsen aallartippoq.
Nalinginnaasumik pingasunngornerni arfininngornernilu Kitaanit Kulusummut uterlugulu timmisartuussinerit aalajangersimasuupput.
- Piffissaq taamaaligaangat ilaanni timmisartoq sisamaannarnik ilaasoqarluni tunuliartarpoq. Taannalu kiffartuussineruvoq pitsak. Ullunili aallarfissamini silamik peqquteqarluni aallanngitsooraangat allatut ajornartumik ilaasussat ulluni arlalinni utaqqisariaqartarput.
- Sila iluarsippat, imaaliallaannaq timmisartoq alla tunuliartussanngortissinnaanngilarput, naluneqanngilarmi kitaani – pingaartumillu Nuummiit Nuummullu uteqattaartut - amerlanerusartut.
Nalilersoqqissaartarparput, ilaasut qassit tunuliarnermi utimullu ilaassanersut, kitaanilu timmisartuussinerup allanngortinnerani qassit eqqorneqassanersut.
- Pissutsit taamaannerat allanngortissappat, Tunumeersut kitaanisulli angallassinermi salliutinneqartalissappata Namminersornerullutik Oqartussanut kiffartuussinermik isumaqatigiissusiortoqaqqaartariaqarpoq. Tunumit Tunumullu angalaniat taama ikitsigitillugit allatut iliorsinnaanngilagut. Sapaatip-akunneranut marloriarluta Tunumut angallassisarnitta akilersinnaannginnera eqqarsaatigalugu aningaasat arlaanninngaanniit aasariaqartarpagut.
- Taamaammat oqartariaqarpunga massakkuugallartoq Tunumit Tunumullu angalaniat silamik peqquteqartumik kinguaattoortussaatillugit, aallarfissap siumut aalajangeriikkap tullianut ilaasussat utaqqisariaqartassapput, Christian Keldsen nassuiaavoq.
