Air Greenland timmisartuutiminik nutarterisussanngortoq
Ilaatigut timmisartuutileqatigiiffiup timmisartorsua Airbus 330 taarserneqassaaq.
Sermitsiaq.ag taama allaaserisaqarpoq.
Timmisartorsuaq Kangerlussuup Københavnillu akornanni ullut tamaasa timmisartuussisarpoq.
- Airbus pisoqalilerpoq. Ilaasunik assartuussinermut nalinginnaasumik ukiut 25-t atorneqartarpoq, tamatumalu kingorna nassiussanik assartuinermut atorneqalertarluni. Uagut timmisartorsuarput ukiunik 21-nik pisoqaassuseqarpoq, airbussimullu aaqqiissutissarsinissaq nutaanik mittarfiliortoqartussanngorneranut naapertuuppoq, Air Greenlandip pisortaanera Jacob Nitter Sørensen taama oqarpoq.
AAMMA ATUARUK Air Greenland aatsaat taama ilaasoqartigalunilu angusaqarfiulluartigisoq
Timmisartorsuullu Airbussip saniatigut Air Greenlandip timmisartuutini suluusallit mikinerusut qulimiguuliutinilu aamma nutartertussaavai. Ilaatigut timmisartut napparsimasunik angallassisartut arlallit taarserneqartussaapput.
Timmisartuutileqatigiiffiup timmisartuutai napparsimasunik angallassisartut siulliullugit taarserneqassapput, napparsimasunillu angallassinermut maanna atorneqartoq pilersaarutit malillugit Super King Airimik nutaarluinnarmik taarserneqassaaq.
Air Greenland aamma qulimiguulinnik AS 350-inik qulingiluanik pigisaqarpoq, taakkulu aatsitassarsiortunik sullissinermut atorneqarnerusarput. Dash 8-t arfineq-marluk aamma pigai, taakkulu nunatsinni ilaasunik assartuussinermut atorneqartarput. Qulimiguullit timmisartullu suluusallit pineqartut arlaannaalluunniit ukiuni aggersuni taarserneqassanngillat.
