Air Greenland: Timmisartumut juulimut aggustimullu billetsit nungoreersut

Juulimi aggustimilu timmisartukkut angalanissamut misissuigaanni, Air Greenlandip nittartagaa nakkutigineqartariaqarpoq. Imaassinnaavoq billettinik amerlasuunik saqqummertoqartoq, timmisartuutileqatigiiffik paasissutissiivoq.
air greenland
Angalasussat 50-it angalanissaminnik taamaatitsissagunik sapaatilluunniit akunneranut allamut nuutsitsissagunik taava billetsit 50-it pisiarineqarsinnaalissapput, taamaalillutik angalasussat allat pisisinnaalissallutik. Assi © : KNR, Anton Gundersen Lihn
juunip 16-at 2020 14:34

Nunatta ammariartoqqinneranut immikkoortoq siulleq ippassaq aallartippoq.

Ilaasartut nalinginnaasut qaammatini qassiiusuni nunatsinnut angalasinnaanngillat, timmisartumulli ilaasartut 600-it sapaatip akunneranut tikissinnaaleqqipput.

Nunatsinnukarnissamut billetsit juulimut aggustimoortullu maannakkut isikkuatut tamakkerlugit tunineqarput, Namminersorlutik Oqartussat pigisaanni attaveqaqatigiinnermut pisortat, Masaana Egede oqarpoq.

AAMMA ATUARUK Nunatsinniit nunatsinnullu angallanneq: Qanermut assiaqut, immersugassaq-Sumut misissortinnerlu

Billetsinut aaqqiissut 'savitungaatsiartoq' taassuma nassuiaatigaa.

Tassa assersuutigalugu angalasussat 50-it angalanissaminnik taamaatitsissagunik sapaatilluunniit akunneranut allamut nuutsitsissagunik taava billetsit 50-it pisiarineqarsinnaalissapput, taamaalillutik angalasussat allat pisisinnaalissallutik.

Sapaatip akunnerani aalajangersimasumi angalanissamik ujaasigaanni taava Air Greenlandip nittartagaatigut billetsinik ujaasiuarnissaq kaammattuutaavoq.

Matumanimi billetsit pisiarineqarsinnaalersoq nassaarineqaratarsinnaasut, Masaana Egedep oqaatigaa.

Nunatta ammariartoqqinnera pingasunik immikkoortoqarpoq. Immikkoortoq siulleq ippassaq aallartippoq. Immikkoortullu tullia qaqugu aallartinneqassasoq oqartussat ingerlaavartumik aalajangiiffigissassavaat.

Nunatta ammariartoqqinnera juunip 15-ianni aallartippoq. Tassa imaappoq:

  • Nunatsinnut tikittut sapaatip-akunneranut amerlanerpaamik 600-sinnaapput.
  • Angalasut tikittussat aallannginnerminni tunillatsissimassanngillat tikereernerminnilu ullut tallimassaanni misissorteqqissallutik.
  • Angalasut tikikkunik ulluni tallimani aninaveersaassapput.
  • Tamatuma saniatigut inerteqqutit innersuussutillu maanna atuuttut atuutiinnassapput.
  • Inuit amerlanerpaamik 100-t ataatsimoorsinnaapput.

Peqqinnissamulli tunngatillugu innersuussutit tamarmik suli malinneqassapput: 

    • Akulikitsumik errortortarneq imaluunniit assanut spritimik atuineq.
    • Qanit talinnik asserlugu quersortarit tangajortarlutillu.
    • Qisernaveersaarit. Allanut tunillaassutaasinnaammat. 
    • Inummiit inummut attaveqarnaveersaarneq, eqqiaaneq silaannarissarnerlu eqqumaffigikkit
    • Allanut qanillinaveersaarneq 2 meterimillu ungasitsigineq.