Timmisartuutileqatigiiffik Nice Air Danmarkimut aqagu tallimanngornermi timmisartuussissaaq. Assi: Christine Hyldal / KNR.

Air Greenland timmisartumik ingerlariaqqinneq ajulertunik Københavniliaassisussamik attartortoq

Air Greenlandip timmisartoq attartugaa Kangerlussuarmit aqagu tallimanngornermi unnukkut tingissangatinneqarpoq.

Ilaasut Kangerlussuarmit ingerlariaqqinneq ajulertut Danmarkimukarnissartik naatsorsuutigisinnaanngorpaat.

Air Greenlandimi timmisartumik Kangerlussuarmit aqagu tallimanngornermi Københavniliartussamik attartornermik isumaqatigiissuteqartoq, Air Greenlandip tusagassiisartua Inga Dóra G. Markussen KNR-imut oqarpoq.

Air Greenlandip timmisartoq attartugaa timmisartuutileqatigiiffiup nutaap Nice Airip pigaa, timmisartorlu taanna Tuluit Nunaata, Danmarkip, Spaniap Islandillu avannaani illoqarfiup Akureyrip akornanni ukioq naallugu timmisartuussisarpoq.

Timmisartoq taanna Kangerlussuarmit unnukkut nalunaaqutaq 18.35 tingissaaq, Danmarkilli nunattalu nalunaaqutaat nikingammata Danmarkimut unnuami missalluni.

AAMMA ATUARUK Air Greenlandip kanngittut kipiluttunartorsiorfigai

Nice Airip timmisartuussinerata saniatigut Københavnimut marlunnik timmisartoqassaaq. Air Greenlandip timmisartuutaa nalinginnaasumik nalunaaqutaq 11.55 tingissaaq taavalu Jet Timep timmisartuutaa, Air Greenlandip aasami attartugaa nalunaaqutaq 15.15 tingissalluni. 

- Pilersaarutareertut saniatigut timmisartuussinissaq Kangerlussuarmi ajornartoornitsinnik aaaqiinissamut iluaqutaasssaqaaq. Utaqqisorpassuit ilanngassavai, Inga Dóra G. Markussen oqarpoq.

Ilaasut Nuummi Ilulissanilu akunneqqasut Nice Airip timmisartua Københavniliartinnagu Kangerlussuarmut timmisartuunneqassapput.

Ilaasut 1000-t missaat pujornerujussua teknikkikkullu ajutoornerit peqqutaallutik sineriammi sumiiffinnit assingiinngitsunit ingerlariaqqinneq ajulertut, Air Greenland ataasinngornermi nalunaarpoq.

Taamaammat Air Greenlandip kitaani sineriammut kitaanilu sineriammit timmisartornissamut billetsinik tuniniaani juulip sinnerani unitsippaa.

Ajornartoornerli qaangiutimisaalerpasippoq. Ilaasut 1000-t missaasa amerlanerpaartaat ullut tulliuttut pingasut ingerlaneranni angalanissaannut nutaamik pilersaarusiuunneqartut, Air Greenland marlunngornermi nalunaarpoq.

Nunatsinni timmisartut tingisut amerliartortut, Air Greenland pingsunngornermi nalunaarpoq. Ingammilli Nuuk aqagu pujussangatinneqarpoq, tamannalu timmisartuussinissanik akimmisitserataannaavoq.

AAMMA ATUARUK Pujuerukkiartorpoq – ilaasussallu aallarsinnaanngungajalersut Air Greenland neriorsuivoq

Ilaasut ilarpassui Danmarkiliartussat Kangerlussuarmi akimmisimaarput, taakkuali ilarpassui ingerlariaqqittussanngorpasipput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl