Air Greenland timmisartumik Baltimor-eriartartussamik attartorpoq

Kangerlussuup Baltimore-illu akornanni timmisartuussisarnissamut amerikamiut timmisartuutaannik Air Greenland attartorpoq. Taama aalajangernermut pissutaavoq, Baltimore-mukartarnissap saniatigut Københavnip Kangerlussuullu akornanni aasaanerani timmisartuussisarnissat Air Greenlandip amerlimmagit. Sermitsiaq nittartakkamini taama allappoq.

Timmisartoq, amerikamiut timmisartuutileqatigiiffiannit, American Trans Airlinesimit, attartorneqartoq tassaavoq, Boeing 757, tassa Air Greenlandip timmisartorsuata Atlantiku qulaallugu timmisartuussisartup aappaata, Kunuunnguup, assinga. Kunuunnguaq Kalaallit Nunaanniit marloriarluni Baltimorimukaarerpat, timmisartoq USA-mit attartugaq taanna aqqummi tassani atorneqartalisaaq, tassa maajip naalerneraniit.

Asaaru angallannerpaaffimmi timmisartoq attartugaq sapaatip akunneranut marloriarluni Baltimore-mukartassaaq uterlugulu, taama ingerlasassalluni septembarip qaammataata tungaanut.

Timmisartoq attartorneqartoq amerikamiunik timmisartortartunik aamma inuttaqartussaavoq, Air Greenlandilli erseqqissaatigaa kalaallimik sulisumik aamma ilaasoqartassasoq, taamaalilluni kalaallisut qallunaatullu paasissutiisoqartarsinnaajumaarluni.