Air Greenland: Takornariat ikinnerungaatsiarput
Takornariat avataaneersut timmisartutsinnut ilaasartut ikilisimasut uppernarsarsinnaavara. Tamanna maluginerpaavarput Københavnimiit Narsarsuarmut ingerlaartarnermi ilaasoqarnerpaaffigisartagaanimi sapaatit akunneranut pingasoriarluni timmisartortarnerit marluinnanngortittariaqarsimagatsigit. Junimi taamaaliortariaqarsimavugut ilaaniartummi ima ikitsigaat pingasoriarluni timmisartuussinissamut ilaasussat naammattarnatik. Taamaammat timmisartuussisarnivut ikilisippavut.
Takornariatut taasinnaasavut, tassa nunatsinni najugaqavissuunngitsut angalatitsiveqatigiillu aqqutigalugit angalanissaminnik aaqqissuisimasut eqqarsaatigalugit 25%-it 45%-illu akornani amerlatigisut aasaq manna ilaasorinngilagut tamannalu siornamut sanilliullugu annertuumik appariarneruvoq.
Angalatitsinermik suliaqartut malugisimasaannut tamanna naapertuuppoq, tassami inuit angalarusupput, kisianni sivisuumik akisuumillu angalanissaq tunullinnguullugu sivikinnerumik qaninnerusumullu angalanissartik toqqarsimavaat, soorlu Narsarsualiarnatik Mallorcamukarusunnerusut maanna takusinnaagipput.
Bilitsit tunineqarnerisa annikilleriarnerat pillugu pilertortumik iliuuseqartariaqarpugut, angalatitsiveqatigiinnillu niueqateqartarnerput imaappoq annikilleriartoqartillugu sukkasuumik iliuuseqarsinnaasarluta. Soorlu timmisartuussisarnissavut ikilisissinnaavagut inissallu allanut tunisinnaallutigit. Tassalumi taamaasiorpugut, Narsarsualiartarnerit ikilisippagut. SAS-ip nunatsinnut timmisartuussisarnini tamaasa unitsissimavai uagullu ilaasussaqarnerulersilaarluta taamaammallu ilaasussat ikileriarnerat Kangerlussuakkut timmisartuussisarnitsigut annertunerusumik maluginngilarput kisianni ilaasut Narsarsuakkoortartut ikileriarneri soorunami malugaarput.
57.000-it nunatsinnut siorna takornariarput. Nunatsinni Takornariartitsinermik Inuussutissarsiornermillu Siunnersuisoqatigiit naatsorsuinerat malillugu takornariartut 50.000-inut ikileriassangatinneqarput.