Air Greenland taarsiiffigitissanngilaq
SAS europamilu timmisartortitseqatigiit allat, EU-mi timmisartuutileqatigiit aaqqissuussaasumik kattuffianni AEA-mi ilaasortaasut, aallartitaat EU-p angallannermut kommissæria ataasinngorpat isumaqatiginninniaqatigissavaat.
Islandimi innermik anitsinerup kingunerisaanik annaasanut taarsiivigineqarnissartik isumaqatiginninniarnermi anguniarniarpaat. Tamanna nutaarsiassaqartitsiviup Ritzaup allaaseraa.
Air Greenlandili taarsiiffigitinnissamut piumasaqarsinnaanngilaq, EU-mut ilaasortaannginnami, taamaammat pisisartut eqqorneqarsinnaasut, Michael Binzer Air Greenlandip pisortaa nassuiaavoq.
- Sapaatip akunnera taanna aningaasarpassuit annaavagut, taamaammallu aningaasat arlaatigut aasariaqarpavut, periarfissatullu kingullertut akinik qaffaasoqarsinnaavoq, Michael Binzer oqarpoq.
Islandimi innermik anitsinerup kingunerisaanik timmisartuusseqqusiunnaarneq Air Greenlandimut minnerpaamik 10 millioni koruuninik tunisatigut, ingerlatsinikkut assigisaanullu annaasaqarfiuvoq.
