Air Greenland: Taama pisoqaqqinnavianngilaq

- Pisimasutut pisoqaqqinnavianngitsoq ilaasartutsinnut oqaatigisinnaavara.

Air Greenlandip pisortaanera, Jacob Nitter Sørensen Dash 8-p Nuummi mittarfimmi mittarfiup naanissaanut 50 meterinut ungasitsigiinnarluni maajip naajartornerani unittariaqarsimanera pillugu oqarpoq.

Timmisartoq ilaasoqarluni nassiussanillu nassataqarluni Kangerlussuarmukarniaraluarpoq. Timmisartorli qangattarniarunnaaginnartariaqarsimasoq, Ingeniøren pajutoornerit pillugit ataatsimiititaliap nalunaarusiaa tunngavigalugu allappoq.

Dash 8-p qangattarniarnerani timmisartoq 80 knopimik– tassa akunnermut 150 kilometerinit missaannik sukkassuseqarpoq. Timmisartortartup timmisartoq qangattartissinnaanngeriaramiuk qangattarniarluni 88 knobimut sukkatsippaa.

Timmisartulli qangattarniarnera iluatsinngimmat timmisartortartoq uneriarujussuarpoq – mittarfiullu naanissaanut 50 meterinik ungasitsigisumi unilluni.

Oqimaassutsit allaguataarnerat kukkusimasoq

- Ilungersunartorujussuarmik tiguarput. Pisup kinguninngua nammineq misissuivugut, tamatuma peqqinnginnissaanut assigiinngitsorpassuarnik aallartitsivugut, Jacob Nitter Sørensen oqarpoq.

Timmisartoq qanoq ililluni oqimaappallaarsinnaava?

- Tassa timmisartumi oqimaassutsit naleqqutinngitsumik agguataarsimapput. Ilaasut – meeqqat, arnat, angutit – assartukkallu tamarmik agguataarnerat ajorsimavoq, Jacob Nitter Sørensen oqarpoq.

AAMMA ATUARUK Timmisartoq mittarfimmit nakkarnissamut 50 meterinik ungasitsigisumi unittoq

Pisortaanerup oqarnera naapertorlugu timmisartumi nassatat oqimaappallaarsimanngillat – taamaalilluni timmisartoq qangattarsinnaanani. Timmisartukkut nassiussat ilaasullu agguataarnerat pissutigalugu timmisartup nutsuinera timmisartortartut naatsorsugaannit 6 centimeterit missaannik siuaqqaneruvoq.

Ajotoornerit pillugit ataatsimiititaliap pisoqarnerata kingorna ilaasut 28-t oqimaassusaannik, nassataasa tigummiarneqarsinnaasut oqimaassusaannik timmisartullu suani issianerannik apeqquteqarfigisimagai, Ingeniøren allappoq.

Puut sioqqanik imallit timmisartumi tunorlermiittut

Angutit nassataallu tigummiarneqarsinnaasut 88 kiilumik oqimaassuseqassangatinneqartarput, arnat 70 kiilu meeqqallu 34 kiilu.

Uanilu ilaasut timmisartortartullu ataatsimut 2600 kiiluunissaat timmisartumi agguataarlugit qarasaasiamit naatsorsorneqarput. Ingeniørenillu allaaserisaani kisitsisit naapertorlugit ataatsimut oqimaassuseq 300 kiilumik qaangiisimavoq. Timmisartortartullu oqimaassutsimik ”nalinginnaasumik” qaangiisimasut ilagaat, timmisartumilu ilaasut oqimaannerusut uani nalaatsornerinnarmi timmisartup siuata tungaanut issaasimapput.

Taama pisoqaqqinnginnissaa qanoq qulakkeersinnaavisiuk?

- Inatsimmi piumasarineqartunit sukanganerusumik ingerlatseriaaseqarpugut – tassa inatsimmi allassimasunit sukanganerusumik killissaqartitsilerpugut. Killissamiingajalersimanitsinnut aarlerisaaruteqartartunik atortoqarpoq. Timmisartumi oqimaassutsit agguataarluaqqanerunissaat pissutigalugu issiaviit amerlanerulersippagut, timmisartumilu tunorlermi puunik sioqqanik imalinnik inissiilluta. Taama pisoqaqqinnavianngilaq, Jacob Nitter Sørensen oqarpoq.