Air Greenland sipaarniarluni soraarsitsivoq

Air Greenlandip sulisuni aqqanillit, taakkunannga ittut arfinillit, ippassaq soraarsippai.
Allattoq Jens Thorin
oktobarip 29-at 2009 10:30

Air Greenlandip pisortaa, Michael Binzer, oqarpoq, unammillerneq sakkortummat aningaasartuutikillisartariaqarlutik. suliffeqarfissuaq nalunaaqqammerpoq, timmisartorsuaq "Kunuunnguaq" aappagu 2010-mi aasaq naappat tunineqassasoq, tassungalu atatillugu sulisut 25-it missaat soraarsinneqassasut. Michael Bizerili neriuppoq, soraarsitsinerit tassunga killeqassasut.

Air Greenland ajornartorsiortinneqaqaaq. Piffissami angallafiunerpaasartumi, Air Greenlandip aningaasarsiorfigisassaani, unammillerneq sakkortunerulersimavoq. Maanna oktoberimi novembarimilu aningaasanik isaatitsisinnaanerput aamma ajornangajalluinnarpoq.

- Tassalu soraarsitsisariaqarnerput aningaasartuutikillisaarnemut ilaavoq, Michael Binzer oqarpoq.

Aasaq Air Greenlandfimut sakkortusimasoq, Air Icelandimit nuannerluinnarsimavoq. Air Icelandip pisortaa, Árni Gunnarsson, 2009-mi naammassisaminnik iluarisimaarinneqisoq, AG-ut septembarip qiteqqunerani oqarpoq, Islandimiit Nuummut timmisartuussisarnitik amerligamikkit iluatsitsisimaqalutik. Illuanilli Nunatsinni timmisartuussisitseaqtigiit iluatsitsivallaarsimanngillat.

- Ataatsimut isigalugu oqarsinnaavugut ilaasukippallaaqaagut. Kisianni taannaannaanngilaq, aamma billettinut qanoq akiliisitsisinnanerput apeqqutaalluinnarpoq, Michael Binzer oqarpoq. Taamaalillunilu oqaatigaa, billettinut akigititatik aningaasartuutinut naleqqiullugit mikivallaartut.

Kisianni Air Greenlandip pisortaata maanna atukkatik ajornartorsiornertut oqaatigerusunngilai, ilungersunartorsiornertut oqaatigierusunnerullugit.

- Timmisartunik qulimiguulinnillu pisisinnaajumalluta, tamanna iliuuseqarfigisariaqarparput. Tassami Nunatsinni innuttaasut sullittussanngorlugit pilersinneqarpugut, Michael Binzer oqarpoq.

Air Greenlandip sulisuminik aqqanilinnik ippassaq soraarsitsineratigut pisortaa neriuppoq, ilungersunartorsiornerup ajornersaa aningorsimassallugu. Allatigut aamma sipaarniarlutik oqaatigaa.