Air Greenland sinneqartoorpoq
Naak kaaviiaartitat 10 millionit koruuninik ikileriarlutik 1 milliard 171,7 millionit koruuninut ikileriaraluartut, Air Greenlandip naatsorsuutimini akileraannginnermini 2014-imi sinneqartoorutai 80,7 millionit koruuniupput, taakkulu ukiup siulianut tassa 2013-imut sanilliullugit 17,5 millionit koruuninik pitsanngoriaateqarput.
Suliffeqarfiup tuniniaaneq ilungersunaraluartoq angusat naammagisimaarpai.
Angallannermi niuerfik naatsorsuutigineqartutut siuariarfiunngitsoq, naatsorsuutinut oqaaseqaatini oqaatigineqarpoq. Air Greenlandip taamaattumik aningaasartuutikillisaanissaq aamma takornariaqarnermi ineriartortitsinissaq aalluppai. Tamatuma peqatigisaanik ingerlatseqatigiiffiup timmisartuata Airbusip nalinginnaasumik imarpik qulaallugu timmisartuussisartup attartortittarnerani suliat amerlinerinit naatsorsuutit sunniuteqarfigineqarput.
Aamma atuaruk Air Greenlandip naatsorsuutai naammagisimaarneqarput
Soorluttaaq Air Greenlandip timmisartuutiminik naleqqussaanerminut atatillugu DASH-8-nik marlunnik pisiaqaqqinneratigut aamma DASH-7-it ukiunik 35-nik pisoqaassusillit tuninerisigut ingerlatseqatigiiffiup unammillersinnaanera pitsanngoriartinneqarpoq.
Naatsorsuutinut oqaaseqaatini takornariaqarnerup ineriartornera Air Greenlandimuinnaanngitsoq inuiaqatigiinnulli tamanut pingaaruteqartutut oqaatigineqarpoq. Taamaattumik tunisassiat ataatsimoortut unammillersinnaasut amerlanerusut ineriartortinneqarnissaat pillugu suleqatigiinnerup annertusineqarnera aqqutigalugu takornariartartut amerlinissaat siunnerfeqartumik sulissutigineqartoq oqaatigineqarpoq. Suliffeqarfiup ingerlatseqatigiiffiutai Nunatta Angalatitsivia aamma Hotel Arctic tamarmik immikkut 3,7 aamma 1,6 millionit koruuninik siorna sinneqartoorfiunerat innersuussutigineqarpoq.
