Air Greenland sapiinnerusariaqarpoq

juulip 13-at 2007 10:36

Inatsisartunut ilaasortap Josef Motzfeldt-ip, IA, Air Greenlandi ippassaq isornartorsiorpaa qunugisaqarnani Kujataani takornariaqarneq siuarsarniarlugu siunniussaqarumanngimmat. Aamma april-miit septembarimut København-miit Narsarsuarmut timmisartuussinerit sumik sianigisaqanngitsutut ililluni pilersarusiorsimanerarpai, taqqavani takornariartitsinermik suliaqartunik ataqatigiissunik suleqateqarnani.

Qununani siunniussaqarnissamik Josef Motzfeldtip oqarnera, Air Greenlandip tuniniaanermut pisortaata Christian Keldsen-p isumaqatiginerarpaa.

- Tamanut akilersinnaasunik iluaqutaasinnaasunik ineriartortitsinissaq Air Greenland-p ukiorpassuarni oqariartuutigiuartarsimagaa, Christian Keldsen oqarpoq.

Kisianni Air Greenland-ip suliassarinngilaa erseqqissumik tikkuassallugit sorpiaat ineriartortinneqassanersut, kisianni piumaneqarluartunik pilersitsisoqartariaqarpoq.

-Taava uagut malinnaassaagut. Inuit timmisartorumanertik piinnarlugu angalaneq ajorput, ornitaqarumallutik timmisartortarput. Tassani tuniniagaq pissanganartuusariaqarpoq suliarineqarluarlunilu. Suliat assigiipput Kangerlussuarmut Canadami Baltimore-mulluunniit tunngagaluarpata, Christian Keldsen erseqqissaavoq.

Kujataani namminersortut nutaanik- soorlu unnuisarfinnik imaatigullu takornarianik angallassissutinik arlalinnik pisaartoqarsimanera, ineriartortitseqataanissamut nammannginnersut apeqqutigigakku, akivoq namminneq angalanissanik tuniniaasuunnginnamik tamanna aaliangigassarinngikkitsik. Kisianni tuniniaasut tuniniagartik pissangartuunerartariaqarpaat.

Christian Keldsen–ip kujataani takornariartitsisartut suleqatigineri ajoriffissaqartinnagit unnerpai. Aamma Tina Jensen–ip Kujataani Takornariartitsinermik Distination South Greenland-imi pisortap oqaatigaa, Air Greenland–imi nutaamik aqutsilersut suleqatigillualernissaat isumalluarfigalugit. Neriullunili tulliani timisartuussinissat pilersaaarusiorneqalerpata tusaaniarneqarlutillu siunersuutitik ilanngunneqarumaartut.

-Septembar okbarilu tamaat aamma angallavitsialaapput, taama naggasiivoq Tina Jensen.

Qaqortup borgmesteriata Simon Simonsen-ip ilumoortuunerarpaa Air Greenland-ip kujataani takornariartitsisartut ataqatigiissumik angallanneq pillugu suleqatigineq ajormagit.