Air Greenland sakkortuumik isornartorsiorneqarpoq
Kujataata Islandillu akornanni, maajimi, juunimi septembarimilu timmisartuussisarnissanut bilitsit tunineqarsimasut ikippallaarnerat pissutigalugu, timmisartuussisarnissat taamaatiinnartariaqartut Air Greenlandip ippassaq nalunaarutigaa.
Bilitsinik tuniniaaneq suliluunniit aallartinngitsoq unitsinneqarmat, Qaqortumi Inuussutissarsiuteqartut isumasiuisoqatigiittarfianni siulittaasup, Jim Riisip, eqqumiigaa. Air Greenlandip pilerisaarisarnini misissuataartariaqaraa isumaqarpoq.
- Narsarsuarmiit timmisartornissamut inniminniiniaraanni Narsarsuaq aqqusaarlugu Keflavikiliarsinnaaneq timmisartuutileqatigiiffiup nittartagaani innersuussutigineqanngisaannarpoq. Air Greenlandilli Nuummut Kangerlussuarmullu angalanissaq pilerisaarutigiuaannarpaa. Keflavikimiit qanoq ililluni angalaqqinnissaq timmisartuutileqatigiiffiup aamma ilisimatitsissutigineq ajorpaa, Jim Riis erseqqissaavoq.
Suleqataata, Narsami Inuussutissarsiuteqartut isumasioqatigiittarfianneersup, Ib Laursenip, Jim Riis isumaqatigaa, oqarluni, timmisartut Kujataata Islandillu akornanni timmisartuussisartussat inunnik hornorujulippassuarnik issimasoqartassasut. Bilitsinik inniminniinerit aallartinneqarsimasinnaagaluarput. Uatsinnut allaannginnami Air Greenlandip aqqut taanna asuli saqqummiukkaa, piviusunngornissaanik eqqarsaateqarani.
Nanortalimmi Inuussutissarsiuteqartut isumasioqatigiittarfianni siulittaasup, Uvdloriaq Petersenip, isornartorsiuneq naggaserlugu oqarpoq, Air Greenlandip aalajangernera inuussutissarsiuteqartunut takornariartitsivinnullu ajornartorsiortitsilissaqisoq. - Air Greenlandip nalunaarutai naatsorsuutigisinnaannginnatsigik uggornarpoq, Uvdloriaq Petersen naggasiivoq.
