Air Greenland: Qaqortumi mittarfiliorneq silatusaarnerussaaq
- Inuiaqatigiit aningaasarsiornerat eqqarsaatigalugu oqartuaannarnikuuvugut, Qaqortumi timmisartunut suluusalinnut mittarfeqartariaqartoq, tassami ilaasut amerlanerpaartaat Qaqortuliartarmata, Air Greenlandimi pisortaaneq Michael Binzer oqarpoq.
Assartuussineq pillugu Isumalioqatigiissitap innersuussutigaa Narsarsuarmi mittarfik matullugu Qaqortumi mittarfilortoqassasoq.
- Taama innersuussineq silatusaarneruvoq, oqarpoq nangillunilu:
- Tassami qulimiguulinnik angallassineq sipaarfigiinnarnagu toqqaannartumik attaveqalersinnaaneq sipaarfiulissaaq. Aamma timmisartumik angallassineq eqqarsaatigalugu naleqqussaaneq pitsaanerulertussaassaaq, Michael Binzer oqarpoq.
Kujataani angallanneq pillugu nalunaarusiami allassimavoq Kujataanut angalasut 80 procentii Qaqortuliartartut. Tassanilu mittarfilioraanni tamanna inuiaqatigiinnut akikinnerussasoq Assartuussineq pillugu Isumalioqatigiissitaq allappoq. Tamanna Michael Binzerip isumaqatigaa:
- Uagut akissaajaatigut apeqqutaallutik ilaasunut billettit akii nalilersorneqartarput, taamaattumik uagutsinnut pingaaruteqarpoq inuit ornigarnerusaanni mittarfeqarnissaq, tassalu Qaqortoq ornigarneqarluartarmat tamanna kikkunnut tamanut iluaqutaaneruinnassaaq, Michael Binzer oqarpoq.
Qaqortumi mittarfiliortoqassappat mittarfik naatsoq innersuussutigineqarpoq kisiannili tallineqarnissamut periarfissaqassasoq aamma innersuussutigineqarluni.
Atlantikoq qulaallugu timmisartuussinissamut maanna Qaqortoq toqqammavissaqanngitsoq Michael Binzerip oqaatigaa, naannermik mittarfiliortoqarallarpat silatusaarneruinnassasoq aamma oqaatigalugu:
- Tassami maannamut takisuumik mittarfiliortoqarnissaanut toqqammavissaqanngilaq, aatsaalli Kujataani ineriartortitsineq ingerlallualerpat takinerusunngornissaa toqqammavissaqalissalluni, Air Greenlandip pisortaa, Michael Binzer oqarpoq.
Attaveqaqatigiinnermut Naalakkersuisup, Jens B. Frederiksenip Radioaviisimut oqaatigaa, Kujataanut angalasut 80 procentii Qaqortuliartarmata tamanna isiginngitsuusaarneqarsinnaanngitsoq, tassami inuiaqatigiinnut akikinneq qinerneqartariaqarmat, taamaammallu Assartuussineq pillugu Isumalioqatigiissitap innersuussutaanut isumaqataalluni oqarluni.
