Air Greenland Portugalimit ikiorneqarpoq

Timmisartorsuarmut, Boeing 757-mut, Københavnimiit ippassarli Narsarsualiartussaagaluamut, siumut utimullu ilaasut 300-t missaat eqqorneqarput. Timmisartorsuaq suli teknikkikkut ajoquteqarpaluppoq.

Air Greenlandip Aqutsisoqarfiani pisortaq, Jørgen Erik Andersen, oqarpoq, timmisartorsuup taartissaanik ulluni kingullerni marlunni attartugassarsiorsimagaluarlutik, ullumikkut aatsaat iluatsittumik.

Timmisartorsuaq teknikkikkut ajoquteqartoq paasigatsiguli timmisartumik attartorfiusinnaasut tamaasa misissuiffigigaluarpavut, Jørgen Erik Andersen nassuiaavoq. Nangipporlu:

-Ajornartorsiutaavoq Europami timmisartuutileqatigiit tamarmik aasaanerani ulapimmata, taamaattumik timmisartumik nassaarsinnaasimanngilagut. Kisianni Portugalimiunit iluatitsivugut, timmisartorlu taanna Københavnimiit Kangerlussuarmut uterlugulu ullumikkut timmisinnaasimavoq.

Jørgen Erik Andersen aperaarput, ilaasut Narsarsuarmi uninngasut ilaannai sooq ullumikkut Kangerlussualiartinneqasimanersut, akivoq; timmisartumi inissanik killeqartunik issiaviiteqarlutik. Tassunga timmisattumut attartorneqarsimasumut Københavnimiit Kangerlussualiarlutik ilaasut issiaviisa amerlaqatai Narsarsuarmiit aallartussaagaluit ilaannit immerneqarsimasut nassuiaatigalugu.

Jørgen Erik Andersenip oqarnera naapertorlugu nunatta iluani angalaniartut akornusersorneqarpallaarsimanngillat. Angalaniartut amerlanerit timmisartuussinernut allanut ulluni kingullerni nussorneqareersimammata.

Timmisartorsuup Boeing 757-p aseqqumi taartissaa suli utaqqivaa, taamaattumillu suli timmisinnaanngilaq.