Air Greenland nunatsinnut ajoqutaasumik iliuuseqarpoq
Nunatta USA-llu akornanni qaninnerusumik suleqatigiinnissaq oqaluuserineqaleruttortoq, naalakkersuinikkut suleqatigiinneq eqqarsaatigalugu kiisalu Amerikamiut suliffeqarfissuannik suleqateqarluta aluminiumik nunatsinni tunisassiornissaq pilersaarusioruttuleripput, Air Greenland ileqqumisut piffissamik toqqaanerliunnguasaarluni nalunaarpoq, Kangerlussuup Baltimorillu akornanni timmisartuussisarnini unitsinniarlugu.
- Alianarpoq nunatsinnullu toqqaannartumik ajoqusiilluni, suliffeqarfik Namminersornerullutik Oqartussanit piginneqataaffigineqartoq annertuumillu aningaasatigut tapiiffigineqartartoq nunatta siunnerfiinik qanoq soqutigisaqanngitsigaluni takutitsimmat, Lars-Emil Johansen allappoq.
Taanna isumaqarpoq timmisartuussisarnerup unitsinneqarnerata kinguneranik, suliffeqarfimmi Namminersornerullutik Oqartussat piginneqataanerat naalakkersuisunit eqqarsaatigeqqinneqartariaqartoq, soorlu timmisartortitseqatigiiffimmik allamik suleqatissarsiornikkut.