Air Greenland nunatsinneersumik unammillerteqalerpoq

Timmisartortitseqatigiiffittaap juunip aallaqqaataani timmisartuussisalernissaa naatsorsuutigineqarpoq sapaatillu-akunnerata naanera minillugu ullut tamaasa timmisartuussisassalluni. Aluu Airlines A/S tusagassiorfinnut nalunaaruteqarluni taama allappoq.
 
Aluu Airlines Københavnip Kangerlussuullu akornanni timmisartuussisassaaq, nunattalu iluani Nuummut Ilulissanullu aamma timmisartuussisassalluni.
 
- Timmisartortitseqatigiiffiup suleqatitaassaata qanoq annertutigisumik Aluu Airlinesimut aningaasalersueqataanissaa apeqqutaatillugu timmisartortitseqatigiiffik timmisartunik attartukkanik imaluunniit nammineq pigisaminik angallassissaaq, timmisartortitseqatigiiffiup pisortaa Kuno Fencker KNR-imut oqarpoq.
 
Billetsip piffissap qanoq ilinerani pisiarineqarnera apeqqutaatinnagu aki aalajangersimasoq
Timmisartortitseqatigiiffik Air Greenlandimi timmisartortartuusimasumit Pele Brobergimit pigineqarpoq, taannalu maannakkorpiaq Copenhagen Business Schoolimi, CBS-imi, ilinniarpoq. Kuno Fencker, siornatigut Cairn Energymi atorfeqarsimasoq maannalu Royal Arctic Linep siulersuisuini siulittaasuusoq, 2015-imi januaarip aallaqqaataani atuutilersumik tuniniaanermi pisortatut atorfinitsinneqarpoq.
 
Tusagassiorfinnut nalunaarummi allassimavoq angalaniartut billetsinik aalajangersimasumik akilinnik pisisinnaassasut, siumut-utimullu billetsi 3999 koruuninut inissinneqarallarsimalluni. Akilu taanna ukioq kaajallallugu atuuttuussaaq.
 
- Ukiup affaa sioqqullugu imaluunniit aqagumut aallartussaalluni billetsimik pisisoqarnera apeqqutaatinnaagu aki ataasiinnaassaaq piffissanullu aallarfissanut allanut allanngortinneqarsinnaassalluni, Kuno Fencker oqarpoq.
 
Januaarip naaneranit billetsinik pisisoqarsinnaalissasoq naatsorsuutigineqarpoq.