Air Greenland nunarsuarmi aatsitassanik takutitsinermi peqataavoq
Nunarsuarmi aatsitassat pillugit saqqummersitsineq Torontomi ukioq manna ingerlanneqartoq nunatsinnit peqataaffigineqarluarpoq. Greenland Resourcesip Aatsitassat Ikummatissallu pisortaqarfiullu takutitsiviisa saniatigut Air Greenland kusanarluinnartumik takutitsiveqarpoq. Tassani Thomas Gruep Air Greenlandimi sulisoq Hans-Peter Hansen paasiniaavigaa.
- Aatsitassarsiornermi timmisartuussinerit pinngitsoorneqarsinnaanngimmata takutitsinermi ilaanissarput pingaaruteqarluinnarpoq. Maani peqataanitsinni nittarsaannissarput pisariaqarpoq sullitareriikkatsinnillu aamma naapitaqartarpugut. Qanoq iluanaaruteqartiginissatsinnut apeqqutaasarpoq ukiumiit ukiumut qanoq aatsitassanik piiaasoqartiginersoq. Ukioq kingulleq 20 millioni koruunit nalinginut aatsitassarsioqatigiiffiit timmisartuuppavut. 800 millioni koruunit missaanni aamma ukioq kingulleq kaaviiaartippavut, Air Greenlandip attartortitsisarnermi akisussaasua Hans-Peter Hansen taama oqarpoq nangipporlu.
- Aatsitassanik piiaasartut timmisartuuttakkavut arfineq-marluk maaniipput. Taamaalilluta Canadami angalalluta ornittaqattaarnagit maani naapippagut tamatumunngalu iluatsillugu aamma Air Greenland nittarsaapparput, Hans-Peter Hansen naggasiivoq.
