Air Greenland millionerpassuarnik annaasaqarataannaavoq

Islandimi qaqqap innermik anitsinerata kingunerisaanik Air Greenlandip Kangerlussuarmiit Københavnimiillu timmisartuussinerit ullumi unitsittariaqarpai.

Ussassaarinermi pisortaq Christian Kjeldsen ima oqarpoq:

- Angalatitseqatigiiffiit mittarfeqarfiillu arlallit assigalugit Kalaallit Nunaannut ullumi angalatitsisinnaanngilagut. Købanhavnimi mittarfik matoqqavoq, aamma nalunaarfigitippugut, nunani Atlantikup avannaaniittuni mittarfiit amerlanersaat ullumi matoqqatinneqartut, aamma tuluit norskillu mittarfii. Pissutaavoq qappap innermik anitsinerata kingunerisaanik silaannaq Atlantikup avannaaniittoq arsakunik qummut 5-6 kilometeri angullugu ussittumik putsermat, Christian Kjeldsen oqarpoq.

Kangerlussuarmiit Københavnimiillu angalasussat 400-ut missaanniittut eqqugaapput. Air Greenlandimullu kinguaattoorneq akisussaaq:

- Ila, koruuninik millionilikkaanik annaasaqaataassaaq. Uagutsinnuinnaq ullormut koruuninik millionit kuartiisa affaasalu akornannik annaasaqaataassaaq, Christian Kjeldsen oqarpoq.

Islandimi qaqqap innermik anitsinera ukioq ataaseq angullugu sivisussuseqaratarsinnaasoq, Ritzau tusagassiorfiata nalunaarutigaa. Timmisartuussileqatigiiffillu Air Greenlandi ulluni makkunani naatsorsuusiorpoq, periarfissaasinnaasunillu misissuileruttorluni:

- Silaannarmik angallaviusussanik alapernaarsuisartut Naviair nalunaarput, arsakut ulluni unnuanilu arlalissuarni tullernik timmisartuussinermik ajoqusiissasoq. Taamammat angallassinissat ullumi taamaatitavut ulluni tulliuttuni iluarsiniarlugit suliniuteqarpugut, Christian Kjeldsen oqarpoq.

Qaqqap innermik maanna anitsisup anitsinera kingulleq ukiut 190-t matuma siornagut pivoq ukiunilu marlunni anitsilluni.

- Innermik anitsineq sivitsuutissappat Kalaallit Nunaannut pilersuineq angallassinerlu qanoq aaqqiissuteqarfigissanerlugu aamma nalilersortariaqarumaarparput, imaassinnaavoq timmisartut allat allakkut ingerlaarfilerlugit aaqqiissuteqartariaqarumaartugut, Christian Kjeldsen naggasiivoq.