Air Greenland mattusseriaannaavoq

Timmisartuussineq ukiortaap kingorna unitsinneqarsinnaavoq. Akissaatit pillugit isumaqatigiinniarnerit ajalusoornerisigut, timmisartortartut timmisartunilu saqisut mattunneqarnissaat Air Greenlandip ilimasaarutigaa.
Allattoq Elisa Isaksen
decembarip 10-at 2010 05:14

Sermitsiami ullumi saqqummersumi taama allaaserinnittoqarpoq.

Flyvebranchens Personale Unionimi siulittaasoq, Per Fallentin, oqarpoq, isumaqatigiinniarnerit nalaanni timmisartortartut sulisitsisuminnit annertuumik piumaffigineqarsimasut.

- Sapaatip-akunnerini marlunni isumaqatigiinniarnerni siuariartoqanngilluinnarpoq. Akissarsiat qaffanneqarnissaat qinnutigisimanngilarput, akissarsiattali taamaaginnarnissaat naammagisinnaallugu nalunaaruteqarluta. Isumaqatigiissutilli atuuttut angisuumik ajorseriarnissaat timmisartortitseqatigiit sakkortuumik piumasaqaatigaat. Isumaqatigiinniarnerni ukiorpassuarni peqataasarpunga, taamatulli pisunik naammattuugaqanngisaannarlunga, Per Fallentin Sermitsiamut oqarpoq.

Illuatungeriit isumaqatigiissutaat 2011-mi marsip ulluisa 31-annut killeqarpoq. Nutaamik isumaqatigiissuteqarnissaq anguniarlugu isumaqatigiinniarnerit oktobarimi aallartipput. Taamaattorli novembarip ulluisa 24-anni mattussinissamik ilimasaaruteqartoqareersorlu, illuatungeriit imminnut attaveqaqatigeeqqinngillat.

Air Greenlandip pisortaanera, Michael Binzer, aviisip oqaaseqartissinnaasimanngilaa.

Taamaattorli timmisartortitseqatigiiffiup apriilimi ataatsimeersuarneranut atatillugu apersorneqarnermini oqarpoq, akissarsiat pillugit isumaqatigiinniarnissanut aningaasatigut tunngavissat annikitsuinnaasut.

Timmisartuutileqatigiiffiup akissarsiat pillugit isumaqatigiinniarnerani, ukiup aappaata affaani, isumaqatigiinniarnerit aappassaa maanna unittooqqapput.