Air Greenland kulturimik nunatsinnut tamarmut siammartereqataalissasoq

Siunissami isiginnaartitsinerit amerlanerusut Nunatsinni illoqarfinni takuneqarsinnaalissapput.
Assi © : Lars Frederik Kleemann Andersen
Allattoq Karsten Sommer
marsip 19-at 2019 14:37
Nutserisoq Per Rosing

Nunatta Isiginnaartitsisarfia Air Greenlandilu kulturip nunatsinnut tamarmut siammarterneqarneranut tapertaasussatut siunertalimmik "AirBorn culture"-imik - "Kulturi timmisoq"-mik - taasamik suleqatigiinnissamut isumaqatigiissummik atsioqatigiipput.

Nunatta Isiginnaartitsisarfia sapaatip akunneri marluk iluatsilluartumik angalareerluni isiginnaartitsissutertik kingulleq Ronja piiaasup pania takutittaqattaareerlugu Nuummut tallimanngormat uterpoq.

Tassarpiarlu Air Greenland isiginnaartitsisartunik sinerissami illoqarfinnut sisamanut angallassisuuvoq, isiginnaartitsiviusuni isiginnaartunut tuusintinut arlalinnut nuannaarutaaqisumik.

- Nunatsinni Isiginnaartitsisarfimmi nunatsinni nammineq isiginnaagassianik isiginnaartitsiartorluta angalanitsinni Air Greenland atorluartaqaarput, isumaqatigiisuteqarnerpullu nuannaarutigalugu, Nunatta Isiginnaartitsisarfiani pisortaq Susanne Andreasen oqarpoq.

- Air Greenlandimik suleqateqarnitta nutaajusup nunatsinni angalasarnissarput ajornannginnerulersissavaa, nangippoq.

Aamma Air Greenlandimi niuernermut pisortap, Maliina Abelsenip, suleqatigiinnermi maluginiagassat arlallit eqqaavai:

- Kulturillu takornariaqarnermik ingerlatsinermi pingaaruteqaleraluttuinnarnera ilutigalugu Nunatta Isiginnartitsisarfianik suleqateqarnitsigut nunatsinni tamanit ilisimaqarnerulernissaa soqutigisaraarput, Maliina Abelsen oqarpoq.