Air Greenland kinguaattoortoq
Air Greenlandip sinerissami sapaatip akunnerata naanerani timmisartuussiarnera silarlunneranit kinguaattoortinneqangaatsiarpoq.
Nuumminngaanniit ipparsarli Danmarkiliartussat aallanngitsoorput, Kangerlussuarmukartussaq silap ajornera pissutigalugu unimmat.
Danmarkimukartussalli ullumikkut anngunniarneqassasut, Air Greenlandimi timmisartortitsinermi pisortaq Jørgen Andersen ilisimatitsivoq.
Ullumikkullu kitaata sineriaani tamarmi nittaallertassasoq silasiortut ilimasaaripput, taamaattorli sinerissami timmisartumik angalasut tarmik ullumikkut aamma apuunniarneqassapput.
Tamannalu pillugu timmisartut ataatsimik ilaneqarput, tassa Nuummiit Kangerlussuarmut Ilulissanut Upernavimmut kiisalu Kangerlussuarmut uterlugu ingerlaartussamik ilaneqarlutik. Timmisartut suluusallit saniatigut qulimiguulik Sikorsky aamma timmisartuussitinneqassaaq, Sisimiut Kangerlussuup Maniitsullu akornanni. Taanna ilaasussanik 20-inik Kangerlussuarmi maanna utaqqisunik timmisartuussissaaq.
Ilaasussaannaanngitsulli aammali juullimi poortugarsiassat nerisassallu silaannakkut assartornerat kinguaattoorpoq.
Jørgen Andersen oqarpoq poortukkat nerisassallu 10 tonsit maanna Kangerlussuarmi akunnattooqqasut, aamma ullumikkut apississunniarneqassasut.
Tamannalu pillugu timmisartut, Nuummut Ilulissanullu assartuisussamik ullumikkut aamma ilaneqarput. Poortukkat Maniitsumut, Sisimiunut Aasiannullu ingerlasussat suli utaqqingallassasut Jørgen Andersen oqarpoq, juullili nallertinnagu taakku aamma apississunniarneqassasut tuppallersaavoq.
