Air Greenland: kaaviaartitat milliardit affaanik ilallugit

Timmisartortitseqatigiiffik Air Greenland suliffeqarfittut nutaamik aatsaat taama annertutigisumik allanngortiterinialerpoq, qullersaqarfik ilaatigut pisariillisarneqassalluni aamma kaaviiaartitat 50 procentimik amerleriartinneqassallutik kiisalu iluanaarutit 100 procentimik amerleriartinneqassallutik! Angallannermi pisunik nutaarsiassaqartitsisartoq Travel People Newsletter taama allaaserinnippoq.
Allattoq Jokum Nielsen
novembarip 22-at 2007 05:15

Qullersaqarfik nutaaq 2008-mi januaarip aallaqqaataaniit atuutilissaaq. Kaaviiaartitat iluanaarutillu amerlineqarnissaannik anguniakkat suliffeqarfiup ukiunut tallimanut pilersaarutaani, Air Greenlandip siulersuisuisa ataatsimiinneranni qanittukkut akuersissutigineqartuni ilaapput. Suleriaasissatut pilersaarutini ilaatinneqarput Air Greenland, Nunatta angalatitsivia, Arctic Umiaq Line aamma Hotel Arctic.

Air Greenlandimi ukiumut kaaviiaartinneqartartut maanna 1 milliard koruunit missaanniipput taakkualu 1,5 milliardinut qaffanneqassapput iluanaarutillu marloriaatinngortinneqassallutik. Timmisartuussiffiit nutaat, timmisartut nunatsinni atorneqanngiffiisa nalaani attartortitsinerit, timmisartuutinik taarsersuinerit, qulimiguullit aallarniutigalugit, tamakkua tassaapput Air Greenlandip ukiuni tulliuttuni unammillerniagassai.

Arctic Umiaq Line ilaasunik angallassinermi inissanik atorluaaniarluni angalanissanut pilersaarutiminik Air Greenlandip angalanissamut pilersaarutaanik ataqatigiissaariaqartoq aamma oqaatigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq