Air Greenland juullip tungaanut ulapputissaqarluarpoq
Air Greenland ulluni makkunani ulapaarlualivippoq, nalinginnaasumik timmisartuussinerit saniatigut, timmisartuussinerit immikkut ittut aqagumiit aallartinneqassammata, taakkulu ullukinneq tikillugu ingerlanneqarumaartut nalunaarutigineqarluni. Timmisartuussinerit saniatigut, atlantikoq ikaarlugu timmisartuussinerit arfininngorpat kiisalu ullukinnermi decemberip 21-ni timmisartuussisoqassasoq oqaatigineqarpoq.
-Piareersaanerit imannak aaqqissorneqarput, tassa aqagumiit immikkut timmisartuussinerpassuit arlallit aallartissagatsigit, nalinginnaasumik timmisartuussinitta saniatigut, Christian Keldsen Air Greenlandimi nittarsaassinermut pisortaq KNR-mut oqarpoq.
Nalinginnaasumik timmisartuussinerit saniatigut ullut tamaasa immikkut timmisartuussinerit ingerlanneqassapput. Air Greelandimiilli erseqqissumik oqaatigineqarsinnaanngilaq juullip qaammataani timmisartuussinerit, ilaasullu qanoq amerlatiginersut. Christian Keldsenilli ilisimatitsissutigaa ilaasorisartakkat siornatigornit allaanerunavianngitsut.
Immikkut ilaasunik timmisartuussinerilli kisimik ingerlanneqanngillat, tassami assartugassat immikkut aamma timmisartukkut ingerlanneqassasut oqaatigineqarpoq, ilaatigut Nuummut, Ilulissanut kiisalu Kulusummut assartugassat ingerlanneqassallutik.
Timmisartulli Dashinik taaneqartartut kisimik juullip qaammataani qimmuttoorlutik timmissanngillat, tassami qulimiguullit qanganisanngulersimasut S-61-mik nalunnginnerusavut ukiuni qulikkaani tallimani nunatsinni aalajaallutik sullissiuarsimasut, ukioq manna kingumut aamma qimmuuttoorlutik timmisartuussinissamik aamma ilimasaaripput.
Nanortalik aqagumiit qulimiguulinnik pingasoriarlutik nunniffigineqassapput, naatsorsuutineqarpoq qulimiguulik aqagu decemberip 15-ni, kiisalu 20-ni ullukinnermilu 21-ni qulimiguulimmik nunniffigineqarumaartoq.
