Air Greenland: Isumannaallisaanissaq pingaarnerpaavoq
Air Greenlandimit maanna erseqqissaatigineqarpoq timmisartut Dash-8-nik taaguutillit assigiinngitsuunerat, namminnerlu pisiassatik tassaanerarpaat Dash 8-200-nik taagukkat.
- SAS-ip Dash-8-it atukkani ajutoornerit arlallit pereersullu siorna atorunnaarpai. SAS-p timmisartuutileqatigiiffiillu arlallit timmisartut Dash-8-it ajornartorsiutigisarsimasaat tassaapput Q400-nik taagukkat. Uagut modeli Q-400 soqutiginngilarput, pisiassatsitulli soqutigisarput tassaavoq Dash-8-200, Air Greenlandimi paasissutissiisartoq Pia C. Bang nalunaarpoq.
- Timmisartuutileqatigiiffittut sullissinitsinni isumannaatsuunissaq salliuttuaannaratsigu Dash-8-200, allarluinnaasoq minnerusorlu pisiarissallugu eqqarsaatigaarput. Taannami issittumi silaannakkut angallassinermi pitsaanerpaasoq, Norgep avannaani timmisartuutileqatigiit Widerøe-kkut uppernarsereerpaat. Dash-8-200 issittumut naleqqulluinnartuuvoq, Pia C. Bang oqarpoq.
Dash 8-200-nik timmisartusinissaq suli qulakkeerlugu
isumaqatigiissutigineqanngilaq. Dash-7-nillu maanna atorneqartut ukiorpassuarni suli pigissangatippaa.
Dash-7-illu atortuisa taarsertariaqalersut kingoraartissaannik pissarsiniarneq ajornarneruleriartortillugu, timmisartuussineq maannakkornit ajornerulissanngippat taakku saniatigut allanik timmisartuuteqarnissaq pisariaqaleriartuinnartoq, Air Greenlandimit erseqqissarneqarpoq.
