Air Greenland-ip timmisartorsua Norsaq Kangerlussuarmi silap ajornera pissutigalugu ullumi København-imut utiinnartariaqarsimavoq.
Norsaq 245-inik illaasoqarluni Kangerlussuaq akunnermik ataatsimik qulaavaariarlugu Island-imi Keflavik aqqusaariarlugu Danmark-imut utiinnartariaqarsimavoq.
Ilaasut 245-iusut København-imi unnuisarfinnut unnuisinneqarallassapput, aqagulu Finland-imiut timmisartuat Air Finland-imeersoq Boing 757 attartugaq timmisartoralugu ilaasut Kangerlussuarmut aqagu timmisartuunneqassapput.
Kangerlussuarmiit timmisartut Dash 7-init immikkut aqagu timmisinneqassapput ilaasut apuuffissaannut ingerlanneqarniassammata. Sinnerilu 20-it pingasunngorpat timmisartuunneqassapput.
Timmisartup Kangerlussuarmut ullumi tikittussaagaluartup tikinnginnerata kingunerisaanik timmisartorsuit marluk imarpik qulaallugu København-imiit Kangerlussuarmut tikissapput, marlunngornikkut Kangerlussuarmut tikittussaq aamma Kangerlussualiartussaammat, taamaalillutik ilaasut katillutik 420-it aqagu Kangerlussuarmut tikiunneqassallutik.
Allakkat nassiussallu periarfissat siulliit atorlugit assartorneqarnissaat Air Greenland-imit isumaginiarneqarput.