Air Greenland: Inissiaateqarneq iluaqutaavoq
Namminersornerullutik Oqartussani atorfillip atorfimminut atatillugu inigisaminni toqqissisimannginnertik pissutigalugu Danmarkimut utiinnalersoq, ulloqeqqanut radioaviisimi ilanngupparput. Suliffeqarfiilli nammineerlutik inissiaateqartarnerat sulisut ineqarnikkut toqqissisimanerannut iluaqutaasoq, Air Greenlandip ukiorpanngortuni misilittagaqarfigaa, suliffeqarfimmi paasissutissiisartoq Tupaarnaq Rosing Olsen tamanna pillugu ima oqarpoq:
-Suliffeqarfiup sulisuminut taamatut inissaqartitsinera sulisut taarseraappallaannginnerannut pissutaaqataasutut oqaatigineqarsinnaavoq. Air Greenladi suliminut iniuteqarpoq, maani Nuummi inissiat 140-150-it missaanniipput, taavalu sineriammi sulisunut aamma inissaqartitsilluni. Tupaarnaq Rosing Olsen aamma oqarpoq sulisut ineqarfinnut katersortinneri iluaqutaasutut isikkoqartoq.
- Taamalillutik inissiaqarfiit eqqissisimanerukannersutut oqaatigineqarsinnaapput, sulisullu imminnut ataqatigiinnerannut aamma tamanna iluaqutaavoq, tassa suliffeqarnermi tamatigut ajornartorsiuteqannginnissaq ineqartitsinermi Air Greenlandip tassa pingaartippaa.
Nunatsinni suliffeqarfissuaq alla, tassa Tele Greenland sulisuminnut immikkut aamma inissiaateqarpoq.
Tele Greenlandip Nuummi immikkoortuata sulisuni 200-it missaaniittut ukiuni kingullerni katillugit 62-inik inissialiuunnikuugaai, Telemi tusagassiisartoq Maliinannguaq M. Mølgaard ilisimatitsivoq. Telep sulisuminut inissiassai tulliit 30- 40-it missaanniittut 2006-ip 2008-llu akornanni sanaartorneqalissapput.
Royal Greenland-ip Nuummi immikkoortua sulisuminut 21-nik manna inissiaateqarpoq, suliffeqarfiullu pilarsaarutigaa inissiat 20 missaannik siunissami ilaneqarnissaat. Royal Greenlandip ineqarfiutaasa ilaat suliffeqarfinnit allanit piginneqataaffigineqarput.
Namminersornerullutik Oqartussat piginneqataaffigisaat suliffeqarfissuit pingasut matumani pineqartut ukiup matuma aalartinneraniit INI A/S aqqutigalugu sulisumik inissaannik piniarsinnaajunnaartunut ilaapput.
