Air Greenland Disko Linelu kinguaattooqqallutillu taamaatitsiinnartariaqartut
Air Greenlandimut ilaallutik angalasussat suli aallarsinnaanngikkallarnertik peqqutigalugu naammagittartariaqassapput. Maannami timmisartuutileqatigiiffik angallassinissamut suli kinguaattooqqallunilu timmisartuussinissanik taamaatitsiinnartariaqarpoq.
Air Greenlandimit Nuummut timmisartuussinissat qulingiluat marlunngornermi ullaap tungaani nalunaaqutaq aqqarnermut qiteqquttoq suli tikissimanngillat, Nuumminngaanniillu timmisartuussisussaagaluit arfineq pingasut suli kinguaattooqqallutik. Taamaammat silarlussimanera suli ajornartorsiortitsilaarpoq.
Kangerlussuarmiit Ilulissanut timmisartuussinissaq ataaseq taamaatiinnarneqarpoq, Ilulissaniillu timmisartuussinissaraluit tallimat aamma taamaatiinnarneqarlutillu kinguaattoorfiupput.
Kujataani Qaqortumi angallassinissaraluit ataasinngornermi marlunngornermi nalunaaqutaq aqqanermut qiteqquttoq tamarmik taamaatiinnarneqarput.
AAMMA ATUARUK Air Greenlandip timmisartuussinissat tamaasa taamaatikkai Nuummilu politiit aqqusinermi angallattoqaqqunngikkaat
Air Greenlandimi timmisartuussinerit ullumi marlunngornermi naammassineqarnissaat pilersaarutigineqarpoq, kujataani angallassineq minillugu.
- Ippassarli pilersaarusiavut ajunngitsumik ullumi ingerlapput, taamaallaat Ilulissani kinguartoorpugut. Kisianni massakkorpiaq angallassivugut. Narsarsualiartussat ullumikkut taamaatiinnartariaqarsimavarput, taakkulu aqagu apuuffissaminnut apuunnissaat naatsorsuutigivagut, Air Greenlandimi timmisartuussinermut immikkoortortaqarfimmi pisortaq, Niels Chemnitz Frederiksen oqarpoq.
Sineriak tamakkerlugu anorlerluni nittaalartalimmik perlunnerata kingunerisaanik angallattussat eqqornerlunneqarput, Air Greenlandimmi timmisartuussinissat tamaasa ataasinngornermi unitsiinnarpai.Taassumalu kingunitsianngua nalunaaqutaq marlunngoriartulersoq ilaasussat 232-t angalanissaat allanngortinneqarlutik.
Aasianni Kangerlussuarmilu ataasiarluni timmisartuussisoqarpoq, nunattali sinnerani timmisartuussisoqarani.
Silasiortut DMI-meersut naapertorlugit ullumi marlunngornermi sila atoruminassaaq. Tunumili aqagu anoraasuarnissaa aarlerisaarutigineqarluni.
Disko Line aamma ajornartorsiorpoq
Assartuussinermik suliffeqarfik, Disko Line silarlunnera peqqutaalluni aamma angallassiniarnermigut kinguaattooqqallunilu taamaatitsisariaqarsimavoq.
- Allatuulli uagut aamma ajoraluartumik saperngutinneqarpugut. Tassa Qeqertarsuup Tunuani kujatanilu angallassinissatsinnik silarluup kinguaatoortippaativut, Disco Linemi pisortaaneq Noëlle Simoud oqarpoq.
- Qeqertarsuup Tunuani aqagu pingasunngornermi silarlunnissaa aarlerisaarutigineqarpoq, kisianni silap takutikkumaarpaa qanoq innissani, taava nalilersuiumaarpugut angallassissanerluta.
- Soorunami ilaasutsinnut taamaatitsiinnarnerit kinguaattoornerillu ajuusaarutigaagut, ilaasuttali isumannaatsumik angallanneqarnissaat tassani pingaartinneruarput.
