- Naatsorsuutit inerneri Covid-19-imit sunnigaaput, tamannalu eqqarsaatigalugu naammaginartutut isigineqarlutik, Air Greenland allappoq.Assi: KNR

Air Greenland coronap ajornartoortitsinerani millionilikkaanik amigartooruteqartoq

Timmisartuutileqatigiiffiup angalanermut killilersuinernit ukiup qiteqqunnerani eqqugaarujussuarpoq, tamannalu aningaasaqarneranut sunniuteqarpoq. Ukiummi qiteqqunnerani 30 millionit koruuninik amigartooruteqarpoq.

Timmisartuutileqatigiiffik Air Greenland ukiup qiteqqunnerani amigartooruteqarpoq.

Timmisartuutileqatigiiffik angalanermut killilersuinernit, pilersaarutit malillugit timmisartuussinissaagaluanik taamaatitsinernit sullitanullu utertitsilluni akiliinerpassuarnit eqqugaanini pissutigalugu ukioq manna qaammatini arfinilinni siullerni akiuuppoq. Tamanna millionilikkaanik amigartooruteqarneranik kinguneqarpoq. 

Ukiup qiteqqunnerani 30,5 millionit koruuninik amigartooruteqarpoq. Siorna ukiup taamaalinerani amigartoorutaanut sanilliullugit 27,3 millionit koruuninik amerlanerupput. 

Air Greenlandip siulersuisuisa timmisartuutileqatigiiffiup angusai amigartooruteqarfiugaluartut naammagisimaarpaat:

- Naatsorsuutit inerneri Covid-19-imit sunnigaaput, tamannalu eqqarsaatigalugu naammaginartutut isigineqarlutik, Air Greenland allappoq.

Nunatsinni qaammatini arfinilinni siullerni timmisartuussinerit 22%-inik ikinnerusimapput, imarpillu qulaallugu timmisartuussinerit 34%-inik ikinnerusimallutik.

Sipaarniarniuteqartariaqarsimasoq

Air Greenlandip timmisartui qulimiguuilu coronavirusip tuniluunnerani killilersuinerit peqqutigalugit nunamiiginnartariaqarsimapput.

Taamaammat timmisartuutileqatigiiffiup atorfillit 60-it soraarsittariaqarsimallugillu atorfiit 100 tungaannut amerlassusillit atorunnaarsittariaqarsimavai.

Timmisartuutileqatigiiffik 3,8 millionit koruuninik sulisunut aningaasartuutikinnerusimavoq. Sulisunut aningaasartuutai katillutik 223 millionit koruuniupput, siorna taamaalinerani 226,8 millionit koruuniusut.

Air Greenlandip kaaviiaartitai siorna taamaalinerani kaaviiaartitaanit maannamut 11,4 procentinik ikinnerupput. Siorna ukiup taamaalinerani kaaviiaartitai 622,9 millionit koruuniupput, maanna 551,8 millionit koruuniusut.

Killilersuinerit ukiumoortumik naatsorsuutinut sunniutissaat apeqqutaangaatsiassasut

Timmisartortartulli coronavirusip tuniluunnerani angallassiunnaartoqaraluartoq ulappupput. Air Greenlandimi allakkanik, nassiussanik minnerunngitsumillu coronavirusimut misissugassanik timmisartuussisaqattaarsimammat.

- Air Greenland Namminersorlutik Oqartussat sinnerlugit ajornartoornermi upalungaarsimaffiusumik piffissami tassani timmisartuussisarpoq, aamma illoqarfinnut, nunaqarfinnut nunanullu allanut timmisartuussisarnissat upalungaarsimasunit qulakkeerneqarluni, Air Greenland allappoq.

Timmisartuutileqatigiiffik, Namminersorlutik Oqartussanit tamakkiisumik pineqartoq, ukiumoortumik angusanut isumalluuteqarpallaanngilaq. 

- Air Greenland A/S-ip 2020-mi naatsorsuutit sinneqartoorfiulaarnissaat naatsorsuutigaa, tamatumunngalu Covid-19-imut atatillugu killilersuinerit sunniutissaat apeqqutaangaatsiassapput.

- Air Greenland suliffeqarfissuullu Kalaallit Nunaanni ingerlatseqatigiiffiutai ikiorsiissutinut akiliutinik, Namminersorlutik Oqartussanit aningaasalersorneqartunik, pissarsisimanngillat.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 10353
  Tunillanneqarsimasut
17
  Peqqisseqqittutut nalunaarutigineqartut 16
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  oktobarip 23-at 2020 nal. 10:45