Air Greenland Cimber Sterlingimik suleqateqarusuppoq

Danmarkip Kalaallit Nunaatalu akornanni silaannakkut angallassisarnissamut pilersaarutit taamaatinneqarallarput, Aalborgillu Kangerlussuullu akornanni aasaq manna angallassisoqarnissaa piviusunngorsinnaanani:

- Ilumoorpoq Danmarkip Kalaallit Nunaatalu akornanni silaannakkut angallassisalernissamik eqqarsaatersoraluaratta. Ukioq mannali taamaaliornavianngilagut, Cimber Sterlingimi tusagassiinermut pisortaq Signe Thorup oqarpoq.

Air Greenland Cimber Sterlingilu suleqatigiinnissamut isumaqatigiissummik atsioqatigiissinnaasimanngillat.

Air Greenlandilli pisortaanerata Michael Binzerip taama oqartoqarnera tupigusuutigaa. Cimber Sterlingimik suleqateqalernissaq qangalili sulissutiginikuuarput, Michael Binzer oqarpoq:

- Tupigaara taama oqartoqarmat. Jyllandimi Karupimut, Bornholmimi Rønnemut kiisalu Sønderborgimut attaveqarsinnaanissaq siunertaralugu Cimber Sterling ukiuni kingullerni marlunni isumaqatigiissusiorfiginiaraluarparput, iluatsinngitsumilli. Taamaammat oqartoqarsinnaanngilaq Air Greenland isumaqatigiissusiorsinnaanisssamik mattussisoq, Air Greenlandip pisortaanera Michael Binzer oqarpoq.

Taamaattoq Jyllandimiut Kalaallit Nunaannukarniarpata suli Københavnikkoortariaqartassapput. Atlantikoq qulaallugu Nunatsinnut ukioq manna timmisartuussisalernissani Cimber Sterlingip pilersaarutiginngilaa, imaanngilarli pilersaarutit taamaativinneqartut. Signe Thorup ima oqarpoq:

- Kalaallit Nunaata iluani timmisartuussinissamut periarfissinneqarsinnaassagutta, Danmarkip Kalaallit Nunaatalu akornanni timmisartuussisalernissamut suli soqutiginnilluarpugut, Cimber Sterlingimi tusagassiinermut pisortaq Signe Thorup oqarpoq.

Timmisartuutileqatigiiffik alla, Norwegian, Kalaallit Nunaannut timmisartuussisalernissaq pillugu pilersaaruteqarpoq.

- Taamaattoqarsinnaassappat suligasuarnikkut tamanna periarfissaalersinnaassaaq, Norwegianip tusagassiivianit oqaatigineqarpoq.