Air Greenland AUL-imik piserusukkaluarpoq, neqeroorfigineqanngitsoorporli

Arctic Umiaq Linep tuniniarneqarneranut atatillugu Namminersornerullutik Oqartussat naapertuutinngitsumik pissusilersorsimasutut Air Greenlandip Royal Arctic Linellu allakkatigut ammasutigut isornartorsiorpai.

Danskit ingerlatseqatigiiffiat, Arctic Travel Group, Namminersornerullutik Oqartussat salliutinnerusimagaat kalaallillu suliffeqarfiutaat taakku marluk tuniniaanerup ingerlanerani allarluinnarmut sangutissimagaat suliffeqarfissuit taakku isumaqarput, naak Air Greenlandip Royal Arctic Linellu Arctic Umiaq Line pisiarissallugu soqutiginnikkaluartut, taamaalillutik sinersortaatit sinerissamut angalasarnerat ingerlateqqissinnaalissallugu. Suliffeqarfiit taakku marluk sinnerlugit Air Greenland allappoq, tuniniaanerup ammasumik unammillernertut ingerlanneqarnissaa akuersaaritsik, paasisinnaanngilaalli Namminersornerullutik Oqartussat tassanngaannaq killormorluinnaq iliormata, tassa danskit ingerlatseqatigiiffiat angalatitsivik Arctic Travel Group tamakkiisumik tapersersorpaat.

Arctic Travel Group-ip ilaatigut piginneqatigaa Air Alpha. Timmisartuutileqatigiiffiulli Air Greenlandip pisortaanera, Flemming Knudsen, Radioaviisimut ullumi oqarpoq, Air Alphap piginneqataanera pissutigalugu Arctic Umiaq Linemik Air Greenland taama soqutiginnitsiginersoq. Air Greenland isumaqaannarpoq tuniniaanermut tunngatillugu allanngortitsisoqarsimasoq, suliffeqarfiulli kissaatigiinarpaa Arctic Travel Groupituulli pitsaatigisumik Arctic Umiaq Line neqerooruteqarfigisinnaallugu.

SIK-p siulittaasuata Jess G. Berthelsenip pisoq Qanoruumi tallimanngormat oqaaseqarfigaa, oqarluni, tuniniaanermi suliaq iluamik ingerlanneqarsimanersoq paasiniarlugu, Unammilleqatigiinnermut Ataatsimiititaliaq SIK-p saaffigilersaaraa.

Naalakkersuisut siulittaasuat Hans Enoksen akisussaasutut oqaaseqartinniarlugu ullumi aamma saaffigaarput, Hans Enoksennilli pappialat suli tigusimannginnamigit, pisorlu Radioaviisikkut taamaallaat tusarallaramiuk, aqagu aatsaat oqaaseqarumavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat