Air Greenland AUL-imik piginneqataajumajunnaarpoq
Arctic Umiaq Line, Air Greenlandip 50 procentinik piginneqataaffigisaa amigartooruteqarpoq, naak Namminersorlutik Oqartussat 5 millioni koruuninik amigartooruteqarnissamut qularnaveeqqusiisimagaluartut.
Namminersorlutik Oqartussat ukiormannamiit amigartooruteqarnissamut qularnaveeqqusiussaat atorunnaarpoq, Air Greenlandillu amigartoorutaanngitsumik sinerissami imaatigut angallassineq tapiiffigineqanngitsoq ingerlassinnaassallugu isumaqanngimmat, suliffeqarfissup tamanna pillugu ingerlatseqatigiiffimmi piginneqataanermi taamaatinnissaa kissaatigalugu.
Air Greenlandimi aningaasatigut kaaviiaartitat 2009-mi naak ikileriaraluartut, Air Greenland akileraarutissat peereerlugit 36,8 millioni koruuninik sinneqartoorpoq.
Air Grenlandip angusarineqartut naammagisimaarpai naak aningaasatigut kaaviiaartitat 39,1 millioni koruuninik ikileriaraluartut.
Suliffeqarfissuup ilaatigut annertuumik ileqqaarniuteqartoqarnera, ukiuni kingullerni marlunni ingerlanneqartoq angusarineqartunut pissutaasut ilaattut oqaatigaa.
Pisortaanerup Michael Binzerip ukiumut angusarineqartut naammagisimaarpai.
- 2009-mi angusarineqartut nuannaarutigaavut, pingaartumik suliatsinnut amerlaqisunut ajornartorsiortitsisumik, Atlantiku qulaallugu timmisartortitsinermi unammillerneq nunarsuarmilu aningaasarsiorneq annikillisimagaluartoq, taama oqarpoq.
Akerlianilli Air Greenlandip ingerlatseqatigiiffii aqutat, Ilulissani Hotel Arctic aamma Kalaallit Nunaani Angalatitseqatigiiffik amigartooruteqarfiusimapput.
