Air Greenland aqagu marloriarluni Atlantikoq qulaallugu timmisartuussissaaq

Taamaalilluni timmisartuutileqatigiiffiup Atlantikoq qulaallugu timmisartuussinernik marlunnik timmisartuussinissani neriuutigaa.

Timmisartuutileqatigiiffiup timmisartuanik Airbus 330-mik Atlantikoq qulaallugu Nunatsinnilu tassunga atatillugu timmisartuussinernik nalinginnaasunik timmisartuussinissaq naatsorsuutigineqarpoq, aallarfissatulli piffissaliussat allannguuteqalaartarnissaat naatsorsuutigineqarsinnaassaaq. Allannguutit tamakkua Air Greenlandip nittartagaani takuneqarsinnaapput.

Tamatuma saniatigut Air Greenlandip Københavnip Kangerlussuullu akornanni Atlantikoq qulaallugu timmisartuata angalatinneqartartup aappaanik immikkut timmisartuussinissaq pilersaarutigineqarpoq, taannalu Københavnimiit Danmarkip nalunaaqutaa najoqqutaralugu ullo'qeqqanut aallassalluni.

Tamatumunnga atatillugu sinerissami immikkut timmisartuussisoqartarumaarpoq.

Ilaasut Atlantikoq qulaallugu immikkut timmisartuussinissamut ilaasussat iluatsitsisut tassaassapput taakkua sisamanngormalli aamma tallimanngormalli utaqqisut, Air Greenland taama nalunaarpoq. Taakkua Air Greenlandimit toqqaannartumik attavigineqarumaarput.

Ilaasussat Nuumminngaanneersut aqagu aallarsinnaassanersut soorunami Nuuk qulaallugu timmisartuusseqqusiunnaarnerup unnuaru atorunnaarsinneqarnissaa apeqqutaassasoq timmisartuutileqatigiiffiup erseqqissarpaa.