Air Greenland annikitsumik ingerlalluarnerulerpoq

Marlunngornermi ualikkut Air Greenland-ip ukiumoortumik ataatsimeersuarnerani naatsorsuutit saqqummiunneqarmata, 2013-imi akileraarutit akilinnginneranni 63,2 millioninik sinneqartooruteqarsimasoq takuneqarsinnaavoq.
Allattoq Mads Lynge
apriilip 23-at 2014 05:35

Naak Air Greenlandip 2013-imi naatsorsuutitigut angusai 2012-imut sanilliullugit sinneqartoorutit 43,6 millioni koruuninik annikilleriaraluartut, kaaviiaartitallu qaffaataat ataatsimut isigalugit killeqaraluartut, naatsorsuutit naammaginartutut siulersuisunit nalilerneqarput.

2013 tassaasimavoq Air Greenlandip oqaluttuarisaanerani IT-mut, tassa qarasaasialerinermut sulianik annerpaamik suliaqarfigisimasaa, siulersuisuni siulersuisoq Jens Wittrup-Willumsen oqarpoq.
Tamatuma nassatarisaanik sullississutitut aaqqissuussat 22-t taarsersorneqarput, siaruarterinermi sullississummik Amadeus Alteamik atuilernissaq periarfissillugu. Taamaalillutik nunani tamalaani timmisartuutileqatigiiffiit allat bilitsinik aaqqissuussisarnerannut ataqatigiittumik, atuisut angalaniarneri Air Greenlandimit aaqqissuunneqarsinnaanngorput.

Pingaartumik Dash-8-p pitsaanerusumik atorneratigut, ingerlatseqatigiiffiullu timmisartorsuata Airbus A-330-p allanngortiterneqarneratigut, ingerlatseqatigiiffimmi sullississutinut ataasiakkaanut aningaasartuutit ikilisinneqartut nalunaarutigineqarpoq.

Suliffissuup naatsorsuutitigut angusai akileraannginnermi 2012-imut naleqqiullutik 43,6 millioni koruuninik annikilleriarput. 2012-imi naatsorsuutitigut angusat sanaartukkanik pigisanik tunisinermi isertitanit 20,1 millioni koruuniusunit sunniuteqarfigineqarput, kiisalu 2013-imi angusat qulimiguulinnik EC225-nik marlunnik pisinissaagaluup taamaatiinnarneqarneranit aammalu Amadeus Altea-p atulersinneqarneranut aningaasartuutinit sunniuteqarnerluffigineqarlutik.

- Ilaasutigut attartortitsisarnikkulluunniit niueruteqarneq naatsorsuutigineqartutut annertuserianngikkaluartut, Air Greenland naammaginartumik angusaqarpoq. Ilaatigut siulersuisut sulisullu aningaasartuutinik ikilisaaniarlutik aallussiuarnerat pissutaalluni taamatut angusaqartoqarpoq. Ukiup ataatsip matuma siornatigut niuerfiup siuariarnissaa naatsorsuutigineqarsimagaluarpoq, kisiannili inuiaqatigiit kalaallit ataatsimut isigalugit aningaasakilliornerisa, taamaalillunilu uuliamik aatsitassanillu ujarlernerup annikillinerata kingunerisaanik tamanna pinngitsoorpoq, siulersuisuni siulittaasoq Jens Wittrup-Willumsen oqarpoq.

Air Greenlandimillu pingaarnertut piginnittut Namminersorlutik Oqartussat ukiumoortumik naatsorsuutit naammagisimaarpaat:

- Air Greenland A/S-imi ingerlalluartoqarnera takusinnaagatsigu, ingerlatseqatigiiffillu pitsaasumik angusaqarmat nuannaarutigaarput. 2013-imi angusat naammaginartutut isigaagut, ukiumilu aggersumi kingumut suleqatigiilluarnissatsinnut qilanaarpugut, Naalakkersuisut siulittaasuat Aleqa Hammond naatsorsuutit pillugit ilaatigut oqarpoq.

Jens Wittrup-Willumsen siulittaasutut toqqarneqaqqipoq, soorlu aamma pisortaq Julia Pars aamma toqqarneqaqqittoq.