Air Greenland aamma ACU isumaqatigiinngittuarsinnarput
Air Greenlandimit oqaatigineqartoq, isumaqatigiinniarnermi Air Greenlandimi aqutsisut piumasarineqartunut tunngatillugu nikeriarsimanerarlugit, saqisut peqatigiiffiannit ACU-mit paasiuminaatsinneqarpoq. Tamatumammi akerlianik ACU, ilaasortamik piumasaqaataannut tunngatillugu, soorlu nerinissanut unillatsiarnernut, ullutsinnut naleqquttumik soraarnerussutisiaqalernissamut ileqqaarnermut, aamma sulisut qassiunissaannik sunniuteqarsinnaanernut tunngasunut atatillugu akerlilersorluinnarneqarnerminnik misigisimagamik
- Ilaasortavut misigisimapput nutaamik isumaqatigiissusiornissamut kissaatertik ilassilluarneqarsimanngitsoq aamma Christian Kjeldsenip KNR-ip Radioaviisianut ippassaq unukkut oqaasii paasiuminaatsinneqarput, Anders Mark Jensen ACU-mi siulittasoq oqarpoq.
Air Greenlandip tulleriiaarinera ACU-mit eqqumiigineqarpoq. Tassami isumaqatigiinniarnermi tunngaviusumik isummiussat millionilippassuarnik nalilittut oqaatigineqartut ilisarisinnaannginnamikkik.
- Christian Kjeldsenip oqaatigisai tunngavigalugit, suliumajunnaartoqarnissaa Air Greenlandimit aalajangiusimaneqartutut taamaallaat paasisinnaavarput, Anders Mark Jensen naggasiivoq.
Pingasunngorpat unnukkut arfineq pingasuniit suliumajunnaartoqarnissaa ACU-mit sioorasaarutigineqareerpoq.