Air Alpha Unammilleqatigiinnermut Ataatsimiititaliamut naammagittaalliornialerpoq

Silannakkut angallassinermi Air Alpha Air Greenlandimut ajorsarmat, Air Alphap pisortaata Poul Lübbertip tamanna isiginngitsuusaaginnarusunngilaa.

- Qularutiginngilluinnarparput Air Greenlandip timmisartuussisinnaanermik kisermaassiniarluni angallannermi akigitinniakkani appasitsissimagai, Air Alphami pisortaq Poul Lübbert narrutsassimaqisoq radioaviisimut oqarpoq.

Air Alpha Air Greenlandimut ajorsartitaareersorlu, Poul Lübbertip unammilleqatigiinnermut ataatsimiititaliaq piumaffigilersaarpaa pisoq misissoqqullugu, apeqqutaaginnalerporli tamanna qanoq iluatsitivigitigissaneraa.

Unammilleqatigiinnermi ataatsimiititaliami inatsisileritooq, Troels Linderoth Lolck ima oqarpoq:

- Air Greenlandip aki neqeroorutigisimasaa piviusorsiorpaluttuusimanngippat Namminersornerullutik Oqartussat akuersisimanissaat qularutigaara. Unammilleqatigiinnermi ataatsimiititaliami suleqataasutut ilimaginngilara, Unammilleqatigiinnermi ataatsimiititaliap nammineq piumassutsiminik suliaq misissuiffigissagaa, ilimagigakku suliami pineqartumi maleruaqqusat tamarmik malinneqarsimanissaat, Troels Linderoth Lolck oqarpoq.

Aperineqaramilu Air Alpha suliap ingerlasimanera pillugu naammagittaalliuuteqarpat qanoq ingerlanneqassanersoq, Troels Linderoth Lolck oqarpoq eqqaamasariaqartoq suliaq taannarpiaq ilimagisariaqarmat pisariusorujussuarmik ingerlanneqarsimassasoq, tassalu akinik kisitseriaaseq ajornakusoortoq atorneqarsimassalluni. Naammagittaalliortoqassappallu namminneq unammilleqatigiinnermi ataatsimiititaliamit neriuutigalugu naammagittaalliuut patsiseqarluartinneqassasoq, taamaalilluni uppernarsaatinik pissarsiniarnissaq ajornakusuunnginnerussammat, soorlu akinik minnaarineraalluni suliat allat taamaattartut. Ilanngullugu Troels Linderoth Lockip oqaatigaa suliat taamaattut qaammaterpassuit ukiulluunniit arlallit ingerlanneqarsinnaasartut.

Unammilleqatigiinnermi ataatsimiititaliap aalajangigaa Nunatta eqqartuussivianut tamatumalu kingorna Højesterettimut ingerlateqqinneqarsinnaapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat