Air Alpha annaassiniarsinnaavoq

decembarip 13-at 2004 10:56

Uumannap sulluani tallimanngormat angallat ajutuulermat, avannaani qulimiguulimmik annaasiniarsinnaasumik soqanngimmat Kangilinnguani sakkutooqarfiup Air Alpha paasiniarsimavaa annaasiniarsinnaanersoq, tamannalu Air Alphap naammassiniarsimagaa, Air Aphap pisortaata tulliata Ole Dorphip oqaatigaa. Kangilinnguani sakkutooqarfiup annanniutaa nassarlugu Air Alpha annaasiniariartorpoq, angallallit ajutuulersoq umiartsiaraarsortunit angallatinillu allanit tikinneqarmat ikiorneqarlunilu Air Alphamit annaasiniariartortut Ilulissanut utiinnarput. Taamaakkaluartoq Air Alpha annaasiniarsinnaalluni uppernarsivaa.

Avatangiisinut naalakkersuisoq Jens Napaattooq Air Alphap piumassuseqarluni iliuuseqarnera iluarisimaarpaa, kiffartuussinermullu isumaqatigiissusiassami 2006-mi atulersussamut annaasiniarnermut atatillugu Air Alphap qulimiguliutaani amoortaammik ikkusinissamut atatillugu Statsministeri attavigineqalersaartoq, Jens Napaattooq radioaviisimut oqarpoq. Nunatsinni ajutoornermi annaassiniarneq naalagaaffiup akisussaaffigaa.