Air Alpha aalajangersimasumik suliaqarunnaarpoq

Timmisartuutileqatigiit Air Greenland nunatsinni timmisartuussinissanik tamanik ukiortaamiit ingerlatsilerneratigut Air Alpha Greenland aalajangersimasunik suliaqarunnaarpoq.

Timmisartuutileqatigiit Air Alpha Greenland Namminersornerullutik Oqartussanik ukiortaamiit timmisartuussisarunnaarput, ilaatigut angallassinerup allanngortinneqarneratigut kiisalu Air Greenlandimut tamakkiisumik suliassanik tunniussinikkut. Namminersortutut timmisartuutilittut suna pisariaqarnersoq Thorkild Videbæk-ip Air Alpha Greenland-imi pisortaasup imak nassuiaatigaa:

- Pingaaruteqarpoq erseqqissassallugu Kalaallit Nunaanni timmisartuussiniaraanni ukioq naallugu aalajangersimasunik sullissinissamik isumaqatigiissuteqarneq pisariaqarmat.

Aalajangersimasumik immineq ingerlassiunnaarnerup kinguneraa Air Greenlandimik suleqateqalerneq, suleqatigiinnerup imarisai imak Thorkild Videbæk-ip oqaatigai:

- Isumaqatigiissutigisimasavut tassaapput ukiut arlallit aalajangersimasumik sullissinissat, attartortitsinitsinnut ilaapput timmisartortartoqarnerat mekanikereqarnerallu. Tuniniaanerit allanullu attaveqarnerit tamakkiisumik Air Greenlandimit ingerlanneqassapput.

Peter Grønvold Samuelsen Air Greenlandimi siulersuisunut siulittaasuusoq radioaviisimut oqarpoq Air Greenland aasaq manna naatsorsuutigisaminit annertunerusumik qulimiguulinnik pisariaqartitsilernini tunngavigalugu Air Alpha-mit qulimiguuliinik pingasunik attartorsimasoq, ilanngullugulu erseqqissarpaa, suliffeqarfiup pisariaqartitsinini tunngavigalugu qulimiguulinnik suluusalinnilluunniit pisinissaminik attartornissaminilluunniit nalilersuiuartartoq.

Air Greenlandimi siulersuisunut siulittaasoq Peter Grønvold Samuelsen ilanngutassiamut immiunneqarusunngilaq.