Aima Jensen Jyllandimi tilluunnermi ajugaasoq
- Rundtip pingajussaaniilerlunga sungiusaasuma oqarfigivaanga rundtip aappassaatulli piguit ajugaassaatit. Taamaallillunga tassa pasitsaleriasaarama ajugaalerlunga. Rundtip pingajussaani ingallunga sukataarnerugama, sukataarsuaarlunga pausiivinnanga, Aima Jensen oqarluttuarpoq.
Taanna Danmarkimi Gringstedimi tilluuttartunngorlaat ajugaaniunnerannut sapaatip akunnerata naanerani peqataanerminut ajugaavoq.
28-nik ukiulik Aima Jensen kujataani Narsaminngaaneersoq, Danmarkimi Billundimi qulimiguulimmik aquttunngorniarpoq. Ilinniarnermi saniatigut tilluunnermik sungiusarniarluni sapaatip akunneranut pingasoriarluni qimuttuitsukkut 20 minutsit ingerlaarluni Koldingimukartarpoq.
Tilluuttartunngorlaanut unammersuarnermut peqataaniaraanni minnerpaamik tilluuttarfimmi ataasiarluni unammereersimasariaqarpoq.
Aima Jensenili tilluuttareerpoq, unamminernimi siullerni marlunni ajorsarpoq.
Ajorsarneratali nukissanitsillugu suli sungiusarnerorusulersippaa.
Sakkutuut timmisartoqarfiani sakkutooq
- Marlunnik unamminikuullunga tillullalerlaanut unammeqataavunga sapaatip akunnerata naanerani. Unamminerit siulliit marluk ajorsarfigivakka. Kisianni tassa ajorsarnikka ilikkagaqaatigivakka aamma ulapillunga sulissutigivakka sungiusarluarlunga, Aima Jensen oqarpoq.
Taassuma unammersuarnermi ajugaanissani naatsorsuutigisimanngikkaluarpaa, taannami misilittagalerniarluni peqataaginnaraluarpoq.
Aima unamminerni siullerni ajorsarpoq, unamminermili kingullermi unammisaa qasulermat Aima sukataalersimavoq.
- Misigisaq imaannaanngeqaaq, tassami ilimaginngikkaluarakku, tassami unamminerit siulliit marluk ajorsarfiginikuugakkit eqqarsaleraluarama når ok ajorsassaguma misigereernikuugakku ajornavianngilaq. Inuuneq ingerlaqqittarpoq, ilikkagaqaatigiinnassavakka taava tullissaanut unammeqqinnissanut assoruussutigiumaarpara.
Aima Jensen maannakkut Danmarkimi najugaqarpoq. Sakkutuut timmisartoqarfiani 2015-imi sakkutuunngorniaqqaarpoq, Nunatsinnilu nunami suleriarluni, umiarsuarmi alapernaarsuummi arnartatuaalluni 2017-imi inuttaanngorpoq.
Maannalu qulimiguulimik aquttunngorniarluni.