Air Greenlandip timmisartorsua Danmarkimit Kangerlussuarmut tallimanngornerup ullaavani tikippoq.

Aila P. Nathansen 16-inik ukioqarpoq Danmarkimilu efterskolerluni. Taanna Nuummut juullisioriarpoq, aqqutaali akunnerup affaani sivisunerulerpoq.

AAMMA ATUARUK Timmisartorsuarmi napparsimasoq coronamik tunillatsissimanngitsoq

Timmisartorsuarmummi ilaasoq inuusuttoq angalanerup nalaani ersiuteqalerpoq.

Tamanna pissutigalugu timmisartorsuarmut ilaasut timmisartumiiginnartariaqarput. Nakorsaanerup oqarnera naapertorlugu inummik nappaammik ersiuteqartoqarnerani periusissiaasoq naliginnaasoq aallartinneqarpoq.

Aila P. Nathansenip timmisartorsuarmi ilaasumik napparsimasoqartoq tusaramiuk aallaqqaammut annilaangalaarsimagaluarpoq.

- Kangerlussuarmut mikkiartornitsinni ilaasumik napparsimasoqartoq paasissutissiissutigineqarpoq. Politiillu aatsaat inummik aallereerpata timmisartumit niusinnaatitaavugut, Aila P. Nathansen oqarpoq.

- Aallaqqaammut annilaalaaqqaarpunga, kisianni assanut tunillannartuiaammik atugaqarlungalu arlaannut qanillinngilanga, taamaammat toqqissisimasutut misigivunga.

Taassuma ilaasut allat eqqissiviissimasut maluginiarsimavai.

- Timmisartumi toqqissisimavunga, annilaangananga. Kisianni inuit eqqissiviilliorlutillu alapernaapput eqqaminnullu marsertorujussuullutik, Aila oqarpoq.

Nakorsaanerup timmisartumi ilaasoq napparsimasoq covid-19-imik tunillatsissimanngitsutut uppernarsarneqartoq KNR-imut oqaatigaa. Misissugarli Nuummut misissugassanngorlugu nassiunneqassaaq.