AIDS pillugu ataatsimeersuarneq aallartippoq

Nunat tamalaat AIDS-imut akiuiniarneranni Suliniaqatigiiffimmi siulittaasuata Julio Montanerip, naalakkersuisut siuttui AIDS-imut akiuiniarnermi aningaasartuutiminnik ikilisaasut appisaluuppai.
Allattoq Elisa Isaksen
juulip 19-at 2010 08:42

AIDS pillugu nunat tamalaat 18-issaannik ataatsimeersuarnerat ippassaq Wienimi ammarneqarpoq.

Naalagaaffiit Peqatigiit pisortaata Ban Ki-moonip ammaalluni oqalugiarnermini nappaatip akiorniarnerani siuariaatit nersualaarpai, taamaattorli tamatumunnga peqatigitillugu suliniuteqarnerup pingaartinneqartariaqarnera erseqqissarlugu.

- Suliniarnerup siuariartornerata ajorseriannginnissaa qulakkeertariaqarparput, Ban Ki-moonj oqarpoq.

Tassami nunarsuatsinni aningaasarsiornikkut ajornartorsiornerup kinguneranik, naalagaaffiit naalakkersuisuisa ilaat AIDS-imut akiuiniarnerminni aningaasartuutiminnik ikileriartitsipput.

- Eqqaasitsissutigilara, ukiuni kingullerpaani, naalakkersuisut siuttui taakkorpiaat ikinngutitik inuussutissarsiornikkut ikiortariaqalermata aamma Wall Streetimi aningaaserivissuarni sulisut annaanniarlugit aningaasanik nassaarniarnissartik ajornartorsiutiginngimmassuk, taamaattorli nunarsuatsinni peqqinnissaq pineqaleraangat, aningaasivitsik imaqannginnerartarpaat, Montaner oqarpoq.

Ilisimatuut, politikerit suliniaqatigiiffinneersullu 20.000-it sinnillit, ulluni arfinilinni ataatsimeersuaqataanissaat naatsorsuutigineqarpoq.