AIDS-ip ullua Sydafrikami aamma malunnartinneqarpoq
Siornatigut præsidentiusimasup hvidløgit rødbedillu AIDS-imut katsorsaatigineqarnissaat kaammattuutigigaluarpai, Jakob Zumalli HIV-mik tunillanneqarsimasut amerlanerit nakorsaatitigut eqqortumik katsorsarneqassasut piumasaralugu.
Afrikami meeqqat tamarmik ataaseq inorlugu ukiullit inuunerat sivitsorsarniarlugu katsorsaatinik katsorsarneqassapput taakkua HIV-mik nappaateqartut paasineqarpata. Tamatumani aamma pineqarput arnat naartusut HIV-mik nappaateqartut, napparsimasut AIDS-eqartut tuberkuloseqartullu. Nappaatit taakkua AIDS-imit eqqugaasunit amerlaqisunit AIDS-imut malitsigitillugit toqussutaasarput. Katsorsaanissamut pilersaarut annertusisaq ukiumi tullermi aprilimi atulissaaq, naallu suli paasinarsinngikkaluartoq Sydafrikap inuit millionilikkaat inuunerat sivitsorsaataasumik qanoq katsorsassanerai, tamanna aprilimi salloqittaataanngilaq, præsident Zumap oqarnera upperissagaanni, tamatumanimi aamma AIDS-imik akiuiniaqatigiit ukiut marlussuit matuma siornagut præsident Zumamik illaruaatissiisimasut upperinnipput, taassuma arnaq HIV-mik nappaatilik illersuuteqarani ilagisimammagu naggataatigullu uffarluni tunillatsissimasinnaanini annikillisarniarlugu. Ullumikkulli præsident Zuma naalagaaffimmi sapiitsuliortutut isigineqarpoq, tassami præsidentitut siulimi Mbekep AIDS pillugu politikkia paatsuugassaanngitsumik iluuseqarfiginiaramiuk. Sydafrikami HIV-mik tunillatsissimasut nunarsuarmi amerlanerpaapput, 5,7 millioniullutik, præsidentilli siuliata Mbekep sivisoorujussuarmik apeqqusertarsimavaa ilumut HIV AIDS-innguussinnaanersoq, taamanikkullu peqqinissamut ministerini kajumissaarsimallugu HIV-mik nappaateqartut hvidløginik rødbedinillu katsorsarneqartassasut. Mbekep AIDS-imut politikkia ajutoorutaasinnaasoq Harvard Universitetip naatsorsugai malillugit Afrikamiut 300.000-init amerlanerusut inuunerannik naleqarsimavoq, inuit inuunerat annaanneqarsimasinnaagaluarpoq inuunerat sivitsorniarlugu nakorsaatitortinneqarsimasuugaluarunik. Maannali tassa præsident Zuma AIDS-imut, ullut tamaasa Sydafrikamiut tuusintilikkuutaat inuunerannik naleqartartumut, sorsuuteqarniarpoq, AIDS-imullu sorsunnini Apartheidimut assersuullugu. Sorsunnermi tassani ajugaavugut, Zuma oqarpoq, pissutigalugu tunniutiinnannginnatta.
