AIDS-imut akiuussutissamik misileraaneq iluatsilluartoq

- Nappaammut toqussutaasinnaasumut Aids-imut akiuussutissaq ukiuni kingullerni 30-ni nassaariniarsaraarput, maannalu nassaarilerilerunarparput.

Thailandimi ilisimatusartut HIV-p virusianut Aids-ertilertartumullu akiuussutissaq nutaaq pinngortissimavaat.

Ullumi Bangkok-imi tusagassiortunik katersortitsinermi Thailandip peqqinnissamut naalakkersuisua ima oqarpoq:

- Maanna misileraaneq naammassivoq, misileraanerullu takutippaa akiuussutissaq taanna misileraanerit 31 procentiini iluatsissimasoq. Naak neriuutigisatsinnit annikinnerungaluartoq ilorraap tungaanut alloriarneruvoq pingaarutilik.

Akiuussutissaq RV144-mik ateqarpoq, sulilu ineriartortinneqarluni. Akiuussutissaq taanna akiuussutissanik marlunnik siornatigut HIV-mut akiuussutissatut atorneqartarsimasunit marlunnik katitigaavoq, namminerlu kajumissutsiminnik misileraaffigitikkumasut Thailandimi 16700-it ukiuni arfineq marlunni ingerlanneqarput. Misileraaffigineqartut pingajorarterutaat HIV-mik tunillatsinnissaminnut aarlerinaateqannginnerupput.

Ilisimatuut paasiuminaatsippaat sooq akiuussutissaq sunniuteqarnersoq, misileraanerimmi siulliit akiuussutissanik taakkuninnga marlunnik immikkut atuinerni sunniuteqartarsimanngillat.

Århus Universitetshospitalimi professorip Aids Fondillu siulittaasuata oqaatigaa tamanna alloriarnerusoq annertooq erseqqissarlugulu aatsaat siullerpaamik sunniutilimmik HIV-mut akiuussutissamik peqalersoq, Clara Bindzak Lindhardt DR-miit oqaluttuarpoq.