Aids-ertut sullinneqarnerat naammagineqanngilaq

HIV Aids-ilu pillugit ilisimatuut 60-it, nunarsuarmi ilisimaneqarluartut, ataatsimoorlutik Afrikap kujalliup præsidentia Thabo Mbeki allaffigaat, peqqissutsimut ministeri soraarseqqullugu. Taamatut soraarsitseqqusineq pissuteqarpoq, Aids-i pillugu Toronto-mi qaammat kingulleq ataatsimeersuarnermi, Afrika kujalliup peqqissutsimut ministeria oqaluttarfimmut qaqilluni, oqarmat, nammineerluni aids-ertut siunnertarlugit hvidløg-inik rødbeder-nillu nerilluartarnissamik.

Ataatsimeersuarnermi taamatut oqarmat, peqataasut qungujutsinneqangaatsiaraluartut, ilisimatuut isumaqarput, taamatut oqarneq quiananngitsoq.

- Afrikami kujallermi aids-i pillugu politikki ajorluinnarpoq, inuillu pissutissaqanngitsumik toqusarlutik. Taamaattumik misistereqarneq Afrikamut kujallermut kanngunartuuvoq, ilisimatuut 60-it taamatut allattut, BBC oqaluttuarpoq.

Nunarsuatsinni Afrika kujalleq aids-imik eqqornerlugaanerpaanut ilaavoq, ukiullu pingasut matuma siorna naalakkersuisut neriorsuigaluarput HIV-eertut 380.000-it ikiorserneqassasut. Neriorsorneqartulli affaannaat ikiorserneqarsimapput.

Nunarsuarmi assigiinngitsorpassuarnit siornatigut kajumissaarutigineqartareerpoq, Afrika-kujallermi peqqissutsimut naalakkersuisup soraarsinneqarnissaa.