Ahmed Akkarip Narsamiissimanini qujamasuutigaa
Danmarkimi muslimit palasiisa ilaat Ahmed Akkari, Islamisk Trossamfundillu oqaaseqartittagaa, isornartorsiunerpaanut taamanikkut ilaavoq.
Taanna Kangia Qiterlermut taamanikkut angalavoq, pruffiiti Muhammedimik titartakkat takutikkiartorniarlugit, Jyllandspostenillu saqqummersitsinera pillugu sakkortuumik akerliusoqarnissaa qiimmassaatigiartorlugu.
Akkarili ullumikkut allanngornikuuvoq. Kukkusumik taamanikkut iliorsimanini nassuerutigereerpaa, Nunatsinniissimaninilu ilaatigut pissutaatinnerarpaa:
- Inuit uanga pillunga imaassinnaavoq eqqarsaatersuuteqartut. Tamanna paasisinnaavara, kisianni uanga pillunga ilisimasatik eqqarsaatigalugit taama tikilluaqquneqartiginera nuannaarutigeqaara. Isorinninniartuunatillu ammapput, aammami ukiuni marlunni Kalaallit Nunaanniikkama. Danmarkimut uteqqinnera ilaatigut peqqissimissutigisarpara, Ahmed Akkari Radioaviisimut oqarpoq.
Akkari Danmarkimi 2006-imi assuarineqaqalunilu oqallisaasorujussuuvoq, Narsaliaramili tikilluaqqusaanini puigornavianngilaa:
- Inuit inussiarneqaat, nunanullu allanut tamanna ilinniartitsissutigisinnaagaluarpaat. Inussiarnernerat nuannaarutigeqaara. Asissuijuitsuunerat maluginiarpara, naak siornatigut iliuuserisimasakka eqqarsaatigineqarsinnaagaluartut, Akkari oqarpoq.
Inuttut allanngortariaqarnini Akkarip Nunatsinniinnermini paasiartulersimavaa:
- Kalaallit Nunaanniinninni imminut isigileriarama kinaassutsiga takuleqaara, allanngortinnissaalu aamma takusinnaalerlugu, Ahmed Akkari oqarpoq.
Silarsuarmik paasinnittaasia allanngoriartortoq Akkarip oqaatigaa, isummallu suliniarnermi tunngavigisat allanngorsinnaanerat nassuerutigalugu:
- Sorsuutigisaq ilumoorpoq, soorluuna pitsaasunik inoqanngitsoq, pitsaasunilli inoqartoq takusinnaagaanni, namminerlu iliuuserisimasani takullugit, taava allanngortoqarsinnaavoq, Kalaallit Nunaanniinneralu tassunga atatillugu pingaaruteqarpoq, muslimi palasi Ahmed Akkari oqarpoq.
