Ahmad Abu Laban toquvoq

februaarip 02-at 2007 05:36

Musliimit Danmarkimi anersaakkut siuttuisa akornanni tusaaneqarnerpaagunartoq, Ahmad Abu Laban, ippassaq unnukkut toquvoq, taamatut allappoq aviisi ullormut saqqummersartoq Jyllands-posten.

Laban 60-inik ukioqarluni kræftimik napparsimalluni toquvoq. Abu Laban muuamaakkkut pillugit Jyllands-posten-imi titartakkat aalassassutigineqaleruttormata Kangianut Qiterlermut angalaqataavoq titartakkat oqaluttuariartorlugit.

-Aliasuttorujussuuvunga, ilisimasaqarluartumik annasaaqarpugut asseqanngitsumik, allamik taarserneqartussaavoq, kisianni taassumatut ittumik taarserneqarsinnaanngisaannassaaq, musliimit anersaakkut siuttuat, tassa imami, Khalil, aviisimut Politikenimut oqarpoq.

Abu Laban ukioq 1946-imi inunngorpoq, Palæstinami illoqarfimmi Jaffa-mi. Danmarkimut 1984-imi tikippoq, taamanili Københavnimi upperisarsioqatigiinni Islamisk Trossamfund-imi imamitut atorfeqarsimavoq, muslimimillu upperisallit tallimanngornerit tamaasa qinuteqatigiinneranni katersortarsimallugit.