Agurkit Danmarkimeersut pinngitsuutitaapput

Danmarkimi Inuussutissaqarnermut Aqutsisoqarfik ima allappoq:

- Agurkit Danmarkimeersut VTEC bakteriaqanngillat. Tamanna naatsorsuutigisimavarput, neriuutigalugulu, Inuussutissaqarnermut Aqutsisoqarfimmi inuussutissaqarneq pillugu upalungaarsimanissamut pisortaq Kim Vandrup Sigsgaard oqarpoq.

Agurkit pineqartut E-coli bakterianik tunillanneqarsimanngitsut tassa paasineqarpoq.

Agurkit Danmarkimeersut bakteriamik VTEC-mik taaneqartartumik aamma bakteriaqarnersut misissuiffiit paasiniarsimavaat, inernerillu ullumi saqqummiunneqarnissaat ilimagineqarsimalluni.
Kalaallit Nunaatalu naatitat eqqussugaasa amerlanersai Danmarkimeersuummata, misissuinermi inernerit tusagaqarfigissallugit aamma pissanngatigineqaqaaq.

Agurkilli, tomatillu salatillu Tysklandip avannarpasinnerusortaaneersut pillugit sillimasoqarnissaa, Inuussutissaqarnermut Aqutsisoqarfiup attappaa, soorlu aamma agurkit Spaniameersut sillimaffigeqquneqartut.

Kalaallit Nunaanni tunillatsittoqarsimaneranik takussutissaqanngilaq, Danmarkimili inuit 14-it VTEC bakterianik tunillatsissimallutik.

Inuit aqqaneq-marluk allat tunillatsissimanissaat pasitsaanneqarpoq, taakkunannga arlallit tartui ajorsisimallutik.