Agpa annaassiniartariaqarsimasoq
Allattoq Mads Lynge
oktobarip 16-at 2006 07:15
Kangilinnguani sakkutooqarfiup alapernaarsuuta umiarsuaq "Agpa" ippassaq ullaap tungaa annaassiniartariaqarsimavoq.
Nukappiaqqat marluk Kangaatsiap eqqaani Saattuni timmiarniarsimapput, Kangaatsiamullu piffissaq uteqqiffissartik qaangermassuk Aasianni politiit kalerrinneqarput.
Taamaalinerani umiarsuaq alapernaarsuut Agpa Qeqertarsuarmiissimavoq, erngerlunilu Saattunukartitaalluni.
Akunnerni pingasuni Agpa ujaasereerluni nukappissat nunaqarfiusimasumi Innalimmi oqquiffissarsimasut nassaarai.
Umiatsiaaraat saavissimavoq, nukappiaqqalli ajunngitsut nassaarineqarput.
- Nukappissat Kangaatsialiaanneqarput, aqqutaanilu suppatortinneqarlutik, Kangilinnguani sakkutooqarfik nittartakkaminni allappoq.
