Agnethe Uummannami: Naalakkersuisup tikinniarnera ajunngilaq – kingusinaarporli

Nukissiuteqarnermut Naalakkersuisoq innuttaasut minguitsumik imissaqannginnertik pillugu naammagittaalliortut ataatsimeeqatigiartorlugit Uummannamukariartorpoq.

Uummannami innuttaasut sapaatini akunnerni marlunngulersuni minguitsumik imissaqanngillat. Taakku umiarsualivimmi sikuminermit aannikumik imigassaminnik aallertarput, piffissalli ingerlanerani naammagittarsinnaannginnerat annertusiartorpoq.

Agnethe Nielsen Petersenip Naalakkersuisut Nuummi allaffiminnit nikillutik, Uummannamut pissutsit qanoq ajortiginerat nammineerlutik alakkassagaat ulluni qassiiusuni piumasaraa.

Maannakkullu alakkaasoqalerpoq. Inuussutissarsiornermut, nukissiuteqarnermut ilisimatusarnermullu naalakkersuisoq, Jess Svane (S) Nukissiorfiit aqagu unnukkut innuttaasunik ataatsimiititsinissaannut peqataajartorluni Uummannamukarpoq.

AAMMA ATUARUK Aalisartut uummannarmiut ikiorneqalersut: Assartuutissaq avannamukartinneqartoq

Imeq pillugu suliaq naatsumik:

- Septembarip 19-iat: Uummannami imeq uuliamik mingutsinneqarsimasoq innuttaasut ilisimatinneqarput. Tamanna septembarip 11-anni pisimasoq, tassanilu Nukissiorfinni sulisup klori akuutissaq atornagu uulia akuleruttoorsimavaa.

- Innuttaasup piffissami tassani pasitsaassaqalerput, imermi uuliarsunnittoq naamaneqarsinnaammat.

- Nukissiorfinni sulisut imermut klorimik kuisigaangamik kiinarpaqartarput, taamaammat sulisup uulia kuigamiuk naamasinnaasimanagu, Nukissiorfiit ilisimatitsipput. Uulia klorilu assigiillutik akimut ersittumik qalipaateqarput.

- Uummannami aalisakkeriviit septembarip 19-iannili matoqqatinneqalerput.

- Meeqqat atuarfiat meeqqeriviillu aamma matoqqatinneqarnikuupput, maannali ammaqqinneqarsimallutik.

- Imeq minguitsoq imertartarfinnut pisillugu Uummannamut assartartorneqartarpoq, taamaalilluni innuttaasut namminneq imertartarlutik. Umiarsualivimmit nilaat aamma agguaanneqartarput.

- Imeqarfimmi imeq minguitsunngorsimasoq septembarip 29-anni nalunaarutigineqarpoq. Imeqarfimmiilli erngup akuerineqarnera Nukissiorfinnit aqaguani uterteqqinneqartariaqarluni.

- Imeq qaqugu imerneqaqqissinnaalissanersoq Nukissiorfinnit suli oqaatigineqarsinnaanngilaq.

- Qujanarpoq tikinneqaleratta, tikinneqanngiinnarnata, kisianni siusinnerusinnaagaluarpoq Nukissiornermut naalakkersuisup maani pisoq pimmalli, kalerriutigineqarmat ulorianartoq atunngilluinnassagipput, ulorianartutut nalilerneqarmalli ilanngussimasariaqaraluarpoq, Agnethe Nielsen Petersen KNR-imut oqarpoq.

- Misigisimanarpoq avataaniit Naalakkersuisuniit pisoq annertuutut isigineqanngitsoq soorlu soqutigineqanngitsugut,

Jess Svanep qanoq iliornissaa takorloorpiuk?

- Erngup aqqutai taarserlik, uuliamik imermut akuleruttoqareernerani ingerlaarfigereernikuusai, illunut tamakkua ruujorit illoqarfinnut imermik pajuttartut Nukissiorfiit pinngortinnikuusai illunut imermut aqqutit taakkua taarsertinnissaat, Agnethe Nielsen Petersen oqarpoq.

 - Kallerup inneranut akiliinerusussaavugut, pissutigalugu imermik uunnaasaqattaaginnavippugut, suniarutta uunnaaqqaarluta, taava kallerup inneranut atuinerput malunnartussaavoq, taanna apeqqutigaarput aamma.

Taanna Uummannami ullumi akerliussutsimik takutitsisuni aquttuuvoq. Innuttaasut 40-t missaat akerliussutsimik takutitsisunut peqataajartorlutik imermik minguitsumik piumasaqarput.

Innuttaasullu naammagittarsinnaannginnerat Jess Svanep paasisinnaalluarpaa.

- Inuttut sulinermi kukkuneq taanna tamatta, tamavitta soorunami ajuusaarutigisorujussuuarput.

- Uummannaliassaanga, tassanilu soorunami uagut nammineq isitsinnik takussavagut ilungersunartup sumiinnera taavalu aamma innuttaasut soorunami oqaloqatiginissaat siunertaavoq.

AAMMA ATUARUK Nukissiorfiit pisortaanerat ingerlaannartumik pisortaajunnaartoq

Nukissiorfiit Uummannami imermik misissuiliorput, atortorissaarullu imaanit tarajuiaasussamik aallartitsiniarluni.

- Sapaatip akunnerata naanerani tassuma maskiinap napparnissaa, misilerarnera ingerlareerpat soorunami naluara ullut qassit qaangiuppata piareersinnaanersoq, Jess Svane oqarpoq.

Nukissiorfinni pisortaanerat, Michael Pedersen ingerlaannartumik pisortaajunnaartoq Nukissiorfiit ippassaq ilisimatitsissutigaat. Pisortaanerup tassanngaannartumik soraarneranut pissutaasoq ilisimatitsissutigineqanngilaq.

Tamannalu Jess Svanep aamma akerusunngilaa.

- Taanna inunnut ataasiakkaanut tunngasorujussuummat allatut oqaaseqarfigisinnaanngilara, Jess Svane oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat