Agnethe Nielsen 85inik ukioqalerpoq

Kalaallit Nunaata oqaluttuarisaanerani Agnethe Nielsen pingaarutilimmik inissisimavoq, naalakkersuinikkut suliaqarnermini inatsisartuni ilaasortaasimalluni ukiorpassuarnilu Narsami borgmesteriulluni.

Agnethe Nielsen 1925-imi Qassimiuni inunngorpoq tassanilu aatakkumini Otto aamma Ane Martinsenikkunni peroriartorluni.

1940-imi Aasianni Efterskolemi atualerpoq. Sorsunnersuup kingorna 1946-imi Agnethe Nielsen Danmarkimi najugaqarpoq 1951-ip tungaanut.

ukioq 1951-imi Agnethe Nielsen Kalaallit Nunaannut uterami Narsami najugaqalerpoq tassanilu politikkikkut suliaqarnini aallartippaa. Agnethe Nielsen Kalaallit Nunaanni arnani borgmesterit siulliit tulleraat. 1980-imi inatsisartuni arnani siullersaalluni ilaasortanngorpoq, inatsisartunilu ilaasortaavoq 1983-ip tungaanut.

Agnethe Nielsen polikikkut suliaqarnermini annertunerusumik isumaginninnikkut tunngassuteqartut aallunneruai.

Agnethe Kalaallit Nunaanni nersornaaserneqarsimasut akornanni amerlanerpaanik nersornaaserneqarnikuuvoq, kunngikkormiut nersornaasiuttagaannik akimanerpaasumik ridderkors-imik nersornaaserneqarnikuuuvoq aammalu Nersornaat mik sølviusumik ataqqinaaserneqarnikuulluni.

Agnethe Nielsen 85-inik ukioqalernerani KNR-imit pilluaqquarput.